Drejtoria e Ndërtimit Masiv të Banesave të Turqisë ka ndërmarrë masa për ndërtimin e strehimoreve moderne në të gjitha 81 provincat. Punimet për këto strehimore moderne kanë nisur me qëllim që qytetarëve t’u ofrohet mbrojtje në rast lufte, katastrofash apo rrjedhjesh të armëve bërthamore.
Qeveria turke ka shqyrtuar skenarë të ndryshëm për shkak të luftës dhe tensioneve në rajon. Qëllimi është krijimi i hapësirave ku civilët mund të mbrohen në rast të një lufte të mundshme apo katastrofe.
Gjatë luftërave dhe tensioneve të fundit në Lindjen e Mesme, është diskutuar për infrastrukturën e strehimoreve në Turqi.
Sipas informacioneve të marra, Ministria e Mjedisit, Urbanizimit dhe Ndryshimeve Klimatike ka nisur një studim gjithëpërfshirës në të gjithë Turqinë, shkruan NTV.
Studimi, për të cilin është diskutuar edhe në mbledhjet e kabinetit të kryesuara nga presidenti Recep Tayyip Erdoğan, ka theksuar mungesën e infrastrukturës së strehimoreve në Turqi dhe faktin se strehimoret ekzistuese nuk plotësojnë kushtet e nevojshme.
Studimi ka shqyrtuar gjithashtu shembuj globalë, duke vënë në dukje praktikat e Izraelit, Japonisë dhe Zvicrës. Në mbledhjen e kabinetit është vendosur që TOKİ të ndërtojë strehimore në të gjitha 81 provincat.
Sipas informacioneve të marra nga NTV, punimet ndërtimore kanë filluar tashmë në disa qytete, kryesisht në Ankara.
Strehimoret do të jenë ndërtesa të qëndrueshme, me qasje të shpejtë në rast katastrofash apo krizash. Kjo do të rrisë sigurinë e qytetarëve në mbarë Turqinë.
Rregulloret që merren me nevojën për strehimore nuk janë të reja në Turqi. Rregullorja për strehimoret, e cila hyri në fuqi në vitin 1987, parashikon ndërtimin e strehimoreve në ndërtesa të një madhësie të caktuar. Megjithatë, ky detyrim në praktikë është shpërfillur kryesisht.
Në shumë projekte banesash, hapësirat e përcaktuara si strehimore përdoren ose si parkingje ose si depo.
