Presidenti i SHBA-së, Donald Trump, e vlerësoi shumë udhëheqësen e parë femër të Japonisë, Sanae Takaichi, në Tokio të martën, duke mirëpritur premtimin e saj për të përshpejtuar ndërtimin ushtarak dhe për të nënshkruar marrëveshje mbi tregtinë dhe mineralet kritike.
Takaichi, një aleate e ngushtë e mikut dhe partnerit të Trump në golf, udhëheqësit të ndjerë japonez, Shinzo Abe, tha gjithashtu se do ta nominonte Trumpin për Çmimin Nobel për Paqen, u tha gazetarëve zëdhënësja e Shtëpisë së Bardhë, Karoline Leavitt.
Kryeministrja e re pritet gjithashtu të ofrojë një paketë investimesh amerikane sipas një marrëveshjeje prej 550 miliardë dollarësh të rënë dakord këtë vit, duke përfshirë ndërtimin e anijeve dhe rritjen e blerjeve të sojës, gazit natyror dhe kamionçinave amerikane, thanë burime të njohura me bisedat, shkruajnë mediat e huaja
Këto gjeste mund të zbusin çdo kërkesë të Trump që Tokio të shpenzojë më shumë për mbrojtjen e ishujve nga një Kinë gjithnjë e më agresive, të cilën Takaichi kërkoi ta shmangte duke u zotuar javën e kaluar të përshpejtojë planet për të rritur shpenzimet e mbrojtjes në 2 përqind të PBB-së.
“Është një shtrëngim duarsh shumë i fortë”, tha Trump, ndërsa dyshja pozoi për foto në Pallatin Akasaka në qendër të Tokios.
“Gjithçka që di nga Shinzo dhe të tjerët, do të jesh një nga kryeministrat e shkëlqyer. Do të doja gjithashtu t’ju përgëzoja që jeni kryeministrja e parë grua. Është një gjë e madhe”, i tha Trump, Takaichi-t ndërsa dyshja u ul për diskutime me delegacionet e tyre.
Trump gjithashtu vlerësoi përpjekjet e Japonisë për të blerë më shumë pajisje mbrojtëse amerikane, ndërsa Takaichi tha se roli i Trump në sigurimin e armëpushimeve midis Kamboxhias dhe Tajlandës, dhe Izraelit dhe militantëve palestinezë, ishin arritje “të papara”.
