Presidenti amerikan Donald Trump ka sugjeruar se karburanti me cilësi të dobët mund të ketë qenë faktori vendimtar në humbjen e helikopterit MH-60R Seahawk dhe avionit luftarak F/A-18F Super Hornet në Detin e Kinës Jugore.
Sipas tij, hetimi duhet ende të përcaktojë rrethanat e plota të aksidentit, megjithatë karburanti i ndotur ose i përzier keq mund të ketë luajtur rol të madh.
“Do të më informojnë së shpejti. Mendoj se duhet të jenë në gjendje ta zbulojnë. Mund të ketë qenë karburant i keq. Dua të them, është e mundur që të ketë qenë karburant i keq. Është shumë e pazakontë që një gjë e tillë të ndodhë,” tha Trump.
Flota Amerikane e Paqësorit (PACFLEET), e cila mbikëqyr operacionet detare në rajonin e Detit të Kinës Jugore, refuzoi të komentojë deklaratat e Trumpit lidhur me rrëzimin e avionëve.
Dy incidente të ndara
Në interval prej vetëm 30 minutash, SHBA humbi një avion dhe një helikopter në Detin e Kinës Jugore.
Marina njoftoi në rrjetet sociale se helikopteri MH-60R Seahawk u rrëzua rreth orës 14:45 me orën lokale “gjatë kryerjes së operacioneve rutinë nga aeroplanmbajtësja USS Nimitz”. Ekipet e shpëtimit arritën të nxjerrin të gjallë tre anëtarët e ekuipazhit, thuhet në njoftim.
Rreth 30 minuta më vonë, edhe avioni luftarak F/A-18F Super Hornet u rrëzua gjatë një operacioni rutinë nga e njëjta aeroplanmbajtëse. Të dy pilotët u katapultuan dhe u shpëtuan me sukses, konfirmoi marina.
Aeroplanmbajtësja USS Nimitz është më e vjetra në flotën detare amerikane dhe aktualisht ndodhet në udhëtimin e saj të fundit përpara planit për t’u tërhequr nga përdorimi vitin e ardhshëm.
