Sipas mediave britanike, presidenti amerikan Donald Trump u ka bërë me dije kohët e fundit bashkëpunëtorëve më të ngushtë se po shqyrton mundësinë e angazhimit të kompanive private ushtarake në Ukrainë. Dislokimi i kompanive të tilla, të cilat kanë përvojë të gjerë në zonat e luftës dhe post-konflikt, do të siguronte mbrojtjen e interesave amerikane pa prani zyrtare shtetërore.
Duke iu referuar më shumë se dhjetë zyrtarëve perëndimorë, gazeta The Telegraph shkruan se kompanitë private amerikane mund të ndihmonin në ndërtimin e fortifikimeve për mbrojtjen e interesave të SHBA-së, duke penguar njëkohësisht Vladimir Putinin të shkelë armëpushimin.
Sipas deklaratave të zyrtarëve amerikanë dhe evropianë, strategjia kryesore për të parandaluar vazhdimin e luftës do të ishte ndihma në rindërtimin e ushtrisë ukrainase, përfshirë riarmatosjen dhe trajnimin e ushtarëve, gjë që do të realizohej nga aleatët evropianë të NATO-s.
Kjo do të nënkuptonte që në Ukrainë roli i kompanive private amerikane do të ishte i ngjashëm me atë në vendet e Lindjes së Mesme dhe, duke pasur parasysh numrin e madh të kompanive të tilla në SHBA, angazhimi i përgjithshëm do të përfshinte disa aktorë.
Kompanitë private ushtarake në SHBA përfaqësojnë një biznes shumë fitimprurës, duke u mbështetur në numrin e madh të veteranëve të ushtrisë amerikane, veçanërisht të njësive speciale.
