Presidenti amerikan Donald Trump do të marrë pjesë të premten në mëngjes në një takim të Këshillit të Sigurisë Kombëtare, njoftoi Shtëpia e Bardhë të enjten vonë, pas sulmeve izraelite ndaj Iranit që kanë tronditur Lindjen e Mesme.
Izraeli njoftoi të premten herët në mëngjes, sipas kohës së Lindjes së Mesme, se kishte ndërmarrë sulme ndaj Iranit, duke shënjestruar objektet bërthamore, fabrikat e raketave balistike dhe komandantët ushtarakë. Izraeli paralajmëroi se kjo do të jetë një operacion afatgjatë për të penguar Teheranin nga ndërtimi i armës bërthamore.
Sipas njoftimit të Shtëpisë së Bardhë, takimi do të zhvillohet të premten në orën 11:00.
Administrata e Trumpit është përpjekur të distancojë SHBA-në nga këto sulme. Sekretari amerikan i Shtetit, Marco Rubio, deklaroi: “Ne nuk jemi të përfshirë në sulmet ndaj Iranit dhe prioriteti ynë kryesor është mbrojtja e forcave amerikane në rajon.”
Ambasadori i Izraelit në Kombet e Bashkuara tha se Izraeli është në dialog të vazhdueshëm me Uashingtonin, por vendimi për të sulmuar Iranin është një vendim i pavarur i udhëheqjes izraelite.
Në një intervistë për CNN, kur u pyet nëse Izraeli pret ndihmën e SHBA-së në rast të një kundërpërgjigjeje nga Irani, ambasadori Danny Danon tha: “Nuk mendoj se duhet të spekulojmë. Ky ishte një vendim i udhëheqjes izraelite.”
Departamenti Amerikan i Shtetit njoftoi se ambasada amerikane në Jerusalem u ka kërkuar të gjithë punonjësve qeveritarë dhe familjarëve të tyre të qëndrojnë në shtëpi deri në një njoftim të dytë.
Zyrtarë amerikanë dhe iranianë kishin planifikuar të dielën në Oman raundin e gjashtë të bisedimeve për programin iranian të pasurimit të uraniumit, por pas sulmeve izraelite mbetet e paqartë nëse bisedimet do të vazhdojnë.
Trump tha më herët të enjten se një sulm izraelit ndaj Iranit “mund të ndodhte shumë lehtë”, por gjithashtu përsëriti shpresën për një zgjidhje paqësore.
Një zyrtar amerikan tha për Reuters se ushtria amerikane po planifikon për çdo skenar të mundshëm në Lindjen e Mesme, përfshirë edhe ndihmën e mundshme për evakuimin e civilëve amerikanë.
