Tensionet midis Shteteve të Bashkuara të Amerikës dhe Venezuelës po rriten në mes të një grumbullimi të madh të marinës amerikane në Karaibet jugore dhe ujërat përreth, për të cilin zyrtarët amerikanë thonë se synon të përballet me kërcënimet nga kartelet e drogës në Amerikën Latine. Presidenti amerikan Donald Trump e ka vendosur luftën kundër karteleve si një nga prioritetet kryesore të administratës së tij, si pjesë e përpjekjeve për kufizimin e migracionit dhe sigurimin e kufirit jugor të SHBA-së.
Edhe pse anijet e Rojës Bregdetare dhe të Marinës amerikane operojnë rregullisht në Karaibet jugore, ky grumbullim është dukshëm më i madh se shpërndarjet e zakonshme në rajon.
Një zyrtar amerikan, që foli në kushte anonimiteti, tha të enjten se shtatë anije luftarake amerikane, së bashku me një nëndetëse të shpejtë me energji bërthamore, ndodhen tashmë në rajon ose pritet të mbërrijnë javën e ardhshme.
Presidenti i Venezuelës Nicolás Maduro i dënoi këto veprime, ndërsa Pentagoni nuk ka sqaruar publikisht se cili do të jetë misioni i saktë i këtyre forcave. Administrata e Trumpit ka theksuar se ushtria mund të përdoret për të luftuar kartelin e drogës dhe grupet kriminale, duke urdhëruar Pentagonin të përgatisë opsione.
Ankesat e Venezuelës në OKB
Venezuela i është ankuar Sekretarit të Përgjithshëm të OKB-së, António Guterres, duke akuzuar Uashingtonin për shkelje të Kartës së Kombeve të Bashkuara.
“Kjo është një operacion propagandistik masiv për të justifikuar atë që ekspertët e quajnë ‘aksion kinetik’ – domethënë një ndërhyrje ushtarake kundër një vendi sovran dhe të pavarur që nuk përbën kërcënim për askënd”, tha ambasadori i Venezuelës në OKB, Samuel Moncada.
Reagimi i SHBA-së
Shtëpia e Bardhë deklaroi të enjten se Trump është i gatshëm të përdorë “çdo element të fuqisë amerikane për të ndaluar përmbytjen e vendit tonë me drogë”.
Sekretarja për shtyp Karoline Leavitt tha se shumë shtete të Karaibeve dhe rajonit kanë mirëpritur operacionet anti-drogë të SHBA-së.
Në shkurt, administrata e Trumpit e shpalli kartelin meksikan Sinaloa, bandat e tjera të drogës dhe grupin kriminal venezuelas Tren de Aragua si organizata terroriste globale.
Forcat e angazhuara
Pjesë e grumbullimit janë edhe USS San Antonio, USS Iwo Jima dhe USS Fort Lauderdale, që transportojnë rreth 4.500 trupa, përfshirë 2.200 marinsa. SHBA ka përdorur gjithashtu avionë spiunë P-8 në rajon për grumbullim të të dhënave.
Maduro: “Diplomacia jonë nuk është diplomaci topash”
Maduro e cilësoi këtë si një kërcënim për paqen dhe tha se vendi i tij do të dërgojë 15.000 ushtarë në kufirin perëndimor me Kolumbinë për të luftuar grupet e drogës. Ai po ashtu bëri thirrje që çdo javë të trajnohen grupe mbrojtjeje civile.
Qeveria e tij shpesh akuzon opozitën dhe të huajt për komplot me entitete amerikane si CIA për të dëmtuar Venezuelën, ndërsa sanksionet i përshkruan si “luftë ekonomike”.
