Talibanët kanë lëshuar një urdhër të ri kundër salloneve të bukurisë që vazhdojnë të funksionojnë fshehurazi në mbarë Afganistanin, duke paralajmëruar gratë që i menaxhojnë ato se kanë një muaj afat për t’i mbyllur, përndryshe do të përballen me arrestim.
Zyrtarisht, talibanët i mbyllën të gjitha sallonet e bukurisë në gusht 2023, duke mbyllur rreth 12.000 biznese dhe duke lënë pa punë mbi 50.000 kozmetologe. Megjithatë, sallonet e fshehta vazhduan të punojnë në komunitete të ndryshme të vendit.
Tani talibanët kanë deklaruar se synojnë të çrrënjosin edhe këto biznese nëntokësore, duke u dhënë udhëzime udhëheqësve të komuniteteve dhe pleqve që të identifikojnë sallonet e fshehta dhe të raportojnë te policia për “virtyte dhe vese” personat që i menaxhojnë.
Frestha, një nënë 38-vjeçare e tre fëmijëve, tha se e ka mbajtur në fshehtësi sallonin e saj që nga viti 2023, sepse nuk kishte zgjedhje tjetër përveç punës për të mbajtur familjen.
“Kur talibanët i mbyllën sallonet, unë isha e vetmja që sillja të ardhura; burri im ishte i sëmurë dhe kisha tre fëmijë për t’i ushqyer. Vazhdova të punoja edhe sepse ndihesha mirë kur i riktheja bukurinë një gruaje. Kur një grua shikonte veten në pasqyrë dhe buzëqeshte, ajo lumturi bëhej edhe e imja,” tha ajo.
Tani, shton ajo, nuk mund të vazhdojë më sepse rreziku është shumë i madh dhe nuk e di çfarë do të ndodhë me familjen e saj.
Që nga marrja e pushtetit nga talibanët në gusht 2021, grave u është ndaluar kryerja e shumicës së formave të punës së paguar, ndërsa vajzave u është pamundësuar shkollimi në nivelin e mesëm dhe universitar.
Organizatat për të drejtat e njeriut theksojnë se talibanët po zbatojnë në praktikë një sistem aparteidi gjinor, duke penguar gratë të marrin pjesë në jetën publike.
Përveç mbylljes së salloneve të bukurisë, palestërave dhe hapësirave të tjera publike, grave u ndalohet të shëtisin në parqet publike, të udhëtojnë pa shoqërim mashkullor, duhet të mbulohen plotësisht kur dalin nga shtëpia dhe nuk u lejohet të flasin në publik.
