Media libaneze Al Mayadeen publikoi informacion se presidenti sirian Ahmed Al Sharaa u takua me një zyrtar izraelit, me ndërmjetësimin e Emirateve të Bashkuara Arabe.
Normalizimi i marrëdhënieve mes Sirisë dhe Izraelit është bërë temë gjithnjë e më e shpeshtë, dhe disa burime nga vende të ndryshme konfirmojnë se bisedimet janë intensifikuar në javët e fundit.
Sipas Al Mayadeen, presidenti sirian u takua të mërkurën me këshilltarin për sigurinë kombëtare të qeverisë izraelite në Abu Dabi, takim ky që thuhet të jetë koordinuar drejtpërdrejt nga presidenti i Emirateve, Mohammed bin Zayed.
Siria kërkon territore libaneze?
Burimet thonë se Al Sharaa dhe këshilltari izraelit mbërritën në Emirate me fluturime të ndara, thuajse në të njëjtën kohë. Ky takim, që u zhvillua në kryeqytetin e Emirateve, përshkruhet si përparim i rëndësishëm në bisedimet sekrete për normalizim mes Damaskut dhe Tel Avivit.
Sipas të njëjtave burime, ka nisur një koordinim mes disa agjencive të reja sigurie siriane dhe qeverisë izraelite. Një nga rezultatet kyçe ishte një koncesion që Al Sharaa ofroi për Lartësirat e pushtuara të Golanit: ai u zotua të bëjë lëshime rreth Golanit në këmbim të mbështetjes ndërkombëtare për t’i garantuar vetes qëndrueshmërinë në pushtet.
Bisedimet përfshijnë krijimin e tre zonave të demilitarizuara në jug të Sirisë (përfshirë provincat Daraa, Quneitra dhe As-Suwayda), ku forcat e rënda do të tërhiqeshin nga kazermat, dhe ku forcat siriane ushtarake dhe policore do të mbeteshin vetëm me armë të lehta.
Mediat izraelite raportuan edhe se një biznesmen dhe aktivist politik sirian vizitoi së fundi Knessetin, duke përcjellë mesazhin e Al Sharaas: ai tha se lideri sirian beson se rajoni po përjeton “mundësi që shfaqen një herë në shekull”.
