Ministri i Punëve të Brendshme, Xhelal Sveçla, ka kujtuar Mon Balajn e Arben Xheladinin në 17-vjetorin e vdekjes së tyre.
Ai ka thënë se përmes kësaj proteste kishin qëllim që të kundërshtonin padrejtësitë që i bëheshin Kosovës, raporton Zeri.info.
“Turma jonë paqësore u ballafaqua me dhunën e padrejtë e të shfrenuar të policisë së UNMIK-ut. Plumba gome u drejtuan në kokat e trupat e protestuesve e nga ta u vranë Mon Balaj e Arben Xheladini teksa u lënduan mbi 80 protestues të tjerë”, shkroi ai ndër tjera.
Sveçla konsideron se Balaj e Xheladini janë dëshmorë të popullit për liri dhe se sakrifica e tyre është motiv për t’i shërbyer vendit.
“17 vite më parë, protestës sonë i printe e ju drejtua edhe Baca Adem Demaçi, veprimtaria e së cilit do të mbetet shembulli ynë më i mirë për ta ndjekur.
Vështirësitë dhe sfidat e tanishme konfirmojnë të drejtën dhe legjitimitetin e protestës së 10 shkurtit. Edhe pse kjo protestë solli ndryshim në atë kohë, akoma ka mbetur shumë për të bërë që aspiratat e drejta të popullit tonë dhe kërkesat e qarta të asaj proteste të plotësohen.
Ne po ecnim drejt atë ditë. Ne do të ecim drejt gjithmonë.
Lavdi Mon Balaj e Arben Xheladini!
Lavdi të gjithë të rënëve për liri!”, shkroi ai në Facebook.
