– Midis të plagosurve kishte fëmijë, njëri prej të cilëve mbërriti në Spitalin Al-Shifa në Qytetin e Gazës me një krah të amputuar
Sulmet ajrore izraelite kanë vrarë të paktën 12 palestinezë, përfshirë një vajzë të vogël, si dhe kanë plagosur dhjetëra të tjerë, duke shënjestruar shkollat që strehonin familje të zhvendosura, tenda dhe civilë që prisnin ndihmë, raporton Anadolu.
Një nga sulmet vdekjeprurëse shënjestroi Shkollën Al-Qahira në Qytetin e Gazës, ku mijëra civilë të zhvendosur ishin strehuar.
Burimet mjekësore konfirmuan se pesë persona u vranë në sulm, përfshirë një fëmijë, ndërsa dhjetë të tjerë u plagosën, disa në gjendje kritike. Midis të plagosurve kishte fëmijë, njëri prej të cilëve mbërriti në Spitalin Al-Shifa në Qytetin e Gazës me një krah të amputuar.
Dëshmitarët okularë raportuan se shkolla e mbushur me familje të zhvendosura që kërkonin strehim, u shënjestrua drejtpërdrejtë nga sulmet izraelite.
Diku tjetër në qytet, dy palestinezë u vranë dhe tre të tjerë u plagosën në një sulm që shënjestroi një grumbull civilësh në lagjen Zeitoun, në juglindje të Qytetit Gaza.
Burimet mjekësore për Anadolu thanë se një palestinez që priste ndihmë humanitare në veri të qytetit Rafah në Gazën jugore u qëllua për vdekje nga forcat izraelite.
Në lagjen Al-Tuffah të Qytetit Gaza, një sulm ajror izraelit goditi një grumbull civilësh, duke vrarë tre palestinezë dhe duke plagosur të tjerë.
Burimet raportuan se në një sulm tjetër me dron goditi një tendë të ngritur në çatinë e Shkollës Al-Rimal, e cila strehonte njerëz të zhvendosur në zonën Al-Rimal të Qytetit Gaza, ku një person u vra dhe disa të tjerë u plagosën.
Dëshmitarët okularë përshkruan skena paniku dhe shkatërrimi ndërsa familjet iknin nga zonat e shënjestruara, shumë prej të cilëve tashmë të zhvendosur nga sulmet e mëparshme izraelite.
