– Rezoluta bën thirrje për ndërprerjen e dhunës, qasjen në ndihma dhe shtetësinë palestineze.
OVIEDO (AA) – Spanja u bëri thirrje vendeve në mbarë botën të mbështesin rezolutën e OKB-së të hartuar nga autoritetet spanjolle që dënon bllokadën e Izraelit ndaj Rripit të Gazës dhe dhunën e tij në të gjitha territoret palestineze, transmeton Anadolu.
“Ne duam që të gjitha vendet të flasin kundër bllokadës çnjerëzore që Izraeli po imponon ndaj Rripit të Gazës, një bllokadë ndaj ndihmës humanitare, ndaj ushqimit, ndaj ilaçeve”, tha ministri i Jashtëm spanjoll Jose Manuel Albares për transmetuesin RTVE përpara votimit të Asamblesë së Përgjithshme.
“Ne duam që të gjithë të bashkohemi për të denoncuar një luftë që nuk ka qëllim tjetër përveçse të shkaktojë vdekje dhe vuajtje dhe ta kthejë Gazën në një varrezë gjigante”, shtoi ai.
Rezoluta, që do të paraqitet nga Spanja dhe Palestina, i përgjigjet asaj që diplomatët e përshkruan si “mosveprim” të Këshillit të Sigurimit të OKB-së ndaj situatës në Palestinë, raportoi e përditshmja spanjolle “El Diario”.
Albares tha se teksti do të kërkojë gjithashtu një shtet palestinez “realist dhe të qëndrueshëm” që përfshin Gazën si dhe dënimin e vendbanimeve të paligjshme izraelite në Bregun Perëndimor të pushtuar, “ku çdo ditë po kryhet dhunë”.
Muajin e kaluar, kryeministri spanjoll Pedro Sanchez ftoi shtetet arabe të bashkëpunojnë për të siguruar suksesin e rezolutës. “Palestina po vdes para syve tanë. Përballë dhunës dhe barbarizmit, vetëm mbrojtja e palëkundur e një rendi botëror ku mbizotëron drejtësia është e mundur”, tha ai në Samitin e Ligës Arabe në Bagdad.
Pak më shumë se një vit më parë, Spanja u bë një nga pak vendet evropiane që njohu zyrtarisht Palestinën.
Madridi ka bërë gjithashtu thirrje që takimi i ardhshëm i OKB-së më 16 qershor të shërbejë si një mundësi për njohje më të gjerë të shtetësisë palestineze.
“Spanja nuk do të ndalet kurrë së foluri për këtë, thyerjen e bllokadës humanitare, avancimin drejt një shteti realist palestinez dhe denoncimin e dhunës së Izraelit në Gaza dhe Bregun Perëndimor”, tha Albares.
