Deputetët në Lituani kanë miratuar një ligj që ndryshon një numër të madh rregullash lidhur me transmetuesin publik, së bashku me shumë amendamente. Njëri prej tyre është veçanërisht bizar dhe lidhet me një mace.
Konkretisht, mes më shumë se 100 amendamenteve të opozitës të pranuara në ligjin e ri për transmetuesin publik, ndodhet edhe një amendament që thotë se macja e deputetes opozitare Agnė Širinskienė ka “të drejtë” të kërkojë dorëheqjen e drejtorit të përgjithshëm të televizionit LRT.
Parlamenti votoi në favor të gjithë paketës së amendamenteve, përfshirë edhe atë që lidhet me macen.
Votimi përfundimtar për ndryshimet e ligjit që rregullon funksionimin e transmetuesit publik pritej të mbahej të enjten, por kryetari i komisionit parlamentar për kulturë, i cili duhet t’i shqyrtojë amendamentet, ndodhet në spital.
Kryetari i parlamentit, Juozas Olekas, tha se votimi ka gjasa të shtyhet për në muajin janar.
Presidenti i Lituanisë, Gitanas Nausėda, mund të vendosë t’i kthejë mbrapsht ndryshimet e ligjit. I pyetur, gjatë hyrjes në Këshillin Evropian në Bruksel, nëse do ta bënte këtë, Nausėda e ironizoi gjithë situatën.
“Ta vendos veton bashkë me macen apo ta miratoj bashkë me macen? Për çfarë po flasim në të vërtetë? A po diskutojmë për një projektligj serioz që i vjen zyrtarisht presidentit, apo thjesht po bëjmë shaka?”, u shpreh Nausėda para gazetarëve lituanezë.
