Forumi shënon angazhimin e parë të madh ekonomik midis dy vendeve që nga tranzicioni politik i Sirisë pas rënies së regjimit të Asadit
Siria dhe Arabia Saudite nisën sot forumin e tyre të parë të përbashkët të investimeve në Damask, me dhjetëra marrëveshje me vlerë 6,4 miliardë dollarë që pritet të nënshkruhen për të forcuar lidhjet ekonomike midis dy vendeve, raporton Anadolu.
I mbajtur në Pallatin Presidencial në Damask, forumi u hap në prani të presidentit sirian, Ahmad al-Sharaa, dhe një delegacioni të nivelit të lartë saudit të udhëhequr nga ministri i Investimeve, Khalid Al-Falih.
Duke folur në këtë aktivitet, Al-Falih tha se të dy palët do të nënshkruajnë 47 marrëveshje dhe memorandume mirëkuptimi me vlerë 24 miliardë rialë sauditë (rreth 6,4 miliardë dollarë).
Marrëveshjet përfshijnë një gamë të gjerë sektorësh, duke përfshirë industrinë, energjinë, ndërtimin dhe sigurinë kibernetike.
Al-Falih shtoi se një marrëveshje e madhe do të nënshkruhet nga kompania saudite “Bayt Al-Ibaa” për të zhvilluar një projekt të rëndësishëm tregtar në qytetin e Homsit. Ai tha se të ardhurat e projektit do të drejtohen për të mbështetur komunitetet siriane.
Në një njoftim të rëndësishëm, ministri gjithashtu tha se marrëveshje të sigurisë kibernetike me vlerë 4 miliardë rialë (1,66 miliardë dollarë) do të nënshkruhen si pjesë e agjendës së forumit.
Agjencia shtetërore siriane e lajmeve SANA citoi ministrin e Informacionit të vendit, Hamza Al-Mustafa, të ketë thënë se marrëveshjet do të ndihmojnë në krijimin e 50.000 mundësive të punës në 14 provincat e Sirisë.
“Këto marrëveshje mbulojnë çdo rajon dhe çdo sektor. Ato nuk kufizohen vetëm në ndonjë pjesë të vendit”, tha ai gjatë një konference për shtyp të mbajtur të mërkurën përpara forumit.
Forumi shënon një moment të rëndësishëm në marrëdhëniet Damask-Riad, të cilat janë përmirësuar gradualisht pas ndryshimit politik në Siri.
Që nga rrëzimi i regjimit të Bashar al-Asadit në fund të vitit 2024, administrata e re e Sirisë ka nisur reforma ekonomike dhe politike dhe ka intensifikuar përpjekjet për të ndërtuar partneritete me aktorët rajonalë dhe ndërkombëtarë.
Asadi, udhëheqësi i Sirisë për gati 25 vjet, iku në Rusi në dhjetor, duke i dhënë fund regjimit të Partisë Baath, e cila kishte qenë në pushtet që nga viti 1963. Në janar u formua një administratë e re kalimtare e udhëhequr nga Sharaa.
