SHBA ka vendosur që të huajt që ndodhen në vend me vizë të përkohshme, aplikimin për qëndrim të përhershëm (“Green Card”) ta bëjnë nga vendi i tyre i origjinës për të fituar të drejtën e qëndrimit të përhershëm.
Lidhur me rregullin e ri për Green Card, e cila mundëson të drejtën e qëndrimit dhe punës pa afat në SHBA, deklaratë ka bërë Shërbimi i Shtetësisë dhe Imigracionit i SHBA-së (USCIS) përmes llogarisë së tij në platformën X.
APLIKIMI DO TË LEJOHET VETËM NGA VENDI I ORIGJINËS
Në deklaratë thuhet se të huajt që ndodhen në SHBA me vizë të përkohshme, përveç rasteve të detyrueshme dhe përjashtimeve të veçanta, do të mund të aplikojnë për Green Card vetëm nga vendi i tyre.
U theksua se ky vendim është marrë për të parandaluar “shfrytëzimin e boshllëqeve në sistem” dhe se synimi është të pengohet që personat të cilëve u refuzohet leja e qëndrimit të përhershëm të qëndrojnë në mënyrë të paligjshme në SHBA.
Në deklaratë gjithashtu u theksua se personat me vizë studenti, vizë pune të përkohshme dhe vizë turistike vijnë në SHBA për një periudhë të kufizuar dhe për një qëllim të caktuar.
“Sistemi është krijuar që këta persona të largohen nga vendi pasi të përfundojë qëndrimi i tyre. Vizita e tyre nuk duhet të konsiderohet si hapi i parë drejt procesit të marrjes së Green Card-it”, thuhet në deklaratë.
