Zyrtarë të lartë në Moskë shprehën hapur gëzimin e tyre pasi liderët e Bashkimit Evropian nuk arritën marrëveshje për përdorimin e aseteve ruse të ngrira për financimin e një kredie të madhe për Ukrainën.
Liderët e BE-së u mblodhën të enjten dhe diskutuan propozimin e presidentes së Komisionit Evropian, Ursula von der Leyen, që fitimet nga asetet ruse të ngrira t’i dërgohen Kievit. Megjithatë, ata nuk arritën konsensus dhe në vend të kësaj vendosën për një kredi prej 90 miliardë eurosh, të financuar përmes huamarrjes së përbashkët, me qëllim që Ukraina të mbetet financiarisht e qëndrueshme.
Kirill Dmitriev, një nga të dërguarit kryesorë të Kremlinit, e quajti këtë vendim “një goditje të madhe për nxitësit e luftës në BE, të udhëhequr nga Ursula von der Leyen e dështuar”.
“Zërat e arsyes në BE e ndalën përdorimin e paligjshëm të rezervave ruse për financimin e Ukrainës. Ligji dhe arsyeja, për momentin, kanë fituar”, shtoi ai në një postim në rrjetin X.
Ndërkohë, Grigorij Karasin, kryetar i Komisionit për Politikë të Jashtme në dhomën e lartë të parlamentit rus, shkroi në Telegram se “për momentin po mbizotëron e drejta ndërkombëtare, e jo Ursula von der Leyen”.
Tërheqjen e BE-së, shtoi ai, e cilësoi si një shenjë të moderuar inkurajuese.
“Mbetjet e një qasjeje të civilizuar ndaj traditave financiare ndaluan ata që po e shtynin situatën drejt një kolapsi të madh”, shtoi Karasin.
Bisedimet e së enjtes u bllokuan pasi kryeministri belg Bart De Wever refuzoi të tërhiqte kundërshtimet e tij ndaj përdorimit të aseteve që ndodhen në një depozitë financiare me seli në Bruksel. Sipas tij, kjo do ta ekspozonte Belgjikën ndaj një vale kërcënimesh ligjore dhe të tjera nga Moska.
Këto asete do të mbeten të ngrira, por nuk do të përdoren për të mbështetur ekonominë ukrainase të lodhur nga lufta. Në vend të kësaj, Kievi – i cili rrezikonte të mbetej pa likuiditet që në pranverën e ardhshme, ndërsa pushtimi i plotë rus po hyn në vitin e pestë – do të marrë një kredi prej 90 miliardë eurosh, të garantuar nga buxheti i përbashkët i BE-së.
Presidenti i Ukrainës, Volodimir Zelenski, i cili të enjten mori pjesë në një pjesë të samitit për të kërkuar përdorimin e miliardave të ngrira të Kremlinit, deklaroi të premten në mëngjes se është mirënjohës ndaj të gjithë liderëve të Bashkimit Evropian për vendimin e Këshillit Evropian mbi 90 miliardë euro ndihmë financiare për Ukrainën, duke përshëndetur gjithashtu faktin që asetet ruse mbeten të ngrira.
