Zëdhënësi i Kremlinit foli për një takim të mundshëm të liderëve midis presidentit Vladimir Putin dhe homologut të tij ukrainas Volodymyr Zelenskyy, duke thënë se është ende e nevojshme të punohet në këtë temë
Rusia tha sot se i konsideron “pozitive” marrëveshjet humanitare të arritura në raundin e tretë të bisedimeve të rinovuara të paqes me Ukrainën në Stamboll një ditë më parë si, raporton Anadolu.
“Vazhdimi i shkëmbimit dhe kthimit të trupave të civilëve … është një aspekt jashtëzakonisht i rëndësishëm humanitar që, nga pikëpamja jonë, duhet të jetë në agjendë. Por prapëseprapë një aspekt pozitiv”, u tha gazetarëve në një konferencë për shtyp zëdhënësi i Kremlinit, Dmitry Peskov.
Duke përsëritur se Moska nuk priste një përparim në bisedime, Peskov tha se propozimet ruse në takim ishin “konstruktive, specifike dhe të synuara posaçërisht në punë thelbësore që mund të çojnë në arritjen e rezultateve specifike”.
Peskov foli gjithashtu për një takim të mundshëm të liderëve midis presidentit Vladimir Putin dhe homologut të tij ukrainas Volodymyr Zelenskyy, duke thënë se është ende e nevojshme të punohet në këtë temë.
“Ata po përpiqen t’i bëjnë gjërat nga radha e kundërt. Së pari, duhet të bëhet e gjithë puna dhe pastaj krerëve (presidentëve) duhet t’u jepet mundësia të regjistrojnë arritjet që janë bërë”, shtoi ai.
Ai mohoi çdo diskutim specifik mbi një takim të mundshëm midis Putinit dhe presidentit të SHBA-së Donald Trump në Kinë në shtator.
Rusia dhe Ukraina zhvilluan raundin e tretë të bisedimeve të drejtpërdrejta për paqe, të ndërmjetësuara nga Turqia, të mërkurën në mbrëmje. Ata ranë dakord për një shkëmbim të ri të të burgosurve me të paktën 1.200 persona nga secila palë.
