– Zëdhënësi i Kremlinit, Dmitry Peskov, riafirmoi gatishmërinë e Moskës për t’u angazhuar në një raund të tretë negociatash të drejtpërdrejta me Kievin
Kremlini tha se është “e rëndësishme” për Rusinë që i dërguari special i SHBA-së në Ukrainë, Keith Kellogg, të vazhdojë përpjekjet e ndërmjetësimit midis Moskës dhe Kievit, gjatë vizitës së tij në kryeqytetin ukrainas, transmeton Anadolu.
“Është shumë e rëndësishme për ne që Kellogg, si përfaqësues i ekipit të (Presidentit të SHBA-së Donald) Trump, të vazhdojë përpjekjet e tij për të ofruar shërbime ndërmjetësimi brenda kornizës së zgjidhjes ruso-ukrainase”, tha zëdhënësi i Kremlinit, Dmitry Peskov, gjatë një konference për shtyp.
Peskov riafirmoi gatishmërinë e Moskës për t’u angazhuar në një raund të tretë negociatash të drejtpërdrejta me Kievin. “Është e qartë se Kievi nuk po nxiton. Ne ende po presim propozime (nga Ukraina) për kohën”, tha ai.
Duke reaguar ndaj njoftimit të Trumpit të dielën se Washingtoni do të dërgojë një numër të paspecifikuar raketash mbrojtëse ajrore Patriot në Ukrainë, Peskov shtoi se Moska niset nga fakti se furnizimet ushtarake amerikane për Ukrainën “kanë vazhduar dhe vazhdojnë”.
Më herët Kellogg mbërriti në kryeqytetin e Ukrainës për një vizitë njëjavore, ku u prit nga Andriy Yermak, kreu i Zyrës Presidenciale të Ukrainës.
Yermak tha në Telegram se ka “shumë tema për diskutim”, duke vënë në dukje se temat në agjendë përfshijnë mbrojtjen, si dhe “forcimin e sigurisë, armët, sanksionet, mbrojtjen e popullit tonë, forcimin e bashkëpunimit midis Ukrainës dhe SHBA-së”.
Dy raundet e para të bisedimeve të drejtpërdrejta midis Rusisë dhe Ukrainës, të parat në më shumë se tre vjet u mbajtën në maj dhe qershor, në metropolin turk, Stamboll.
