Një këshilltar i lartë i presidentit ukrainas Volodymyr Zelenskiy, Mykhailo Podolyak, i ka thënë Reuters se e mohojnë një akuzë të Rusisë se Kievi u përpoq të sulmonte termocentralin bërthamor të Zaporizhzhia (ZNPP) me një dron.
“Pa dyshim, Ukraina nuk ka kryer asnjë lloj sulmi me dron në ZNPP, nuk ka planifikuar dhe as teorikisht nuk do ta bëjë këtë”, tha Mykhailo Podolyak për Reuters në një deklaratë.
Reuters raportoi se forcat ruse të sigurisë thanë të mërkurën se Ukraina kishte tentuar të sulmonte një objekt të magazinimit të karburantit bërthamor në centralin bërthamor të Zaporizhzhia me një dron sulmues, duke cituar agjencinë shtetërore të lajmeve RIA, e cila nuk ia atribuoi këtë informacion ndonjë burimi apo zyrtari të emërtuar.
Forcat ruse të sigurisë arritën në përfundimin e tyre duke analizuar rrugën e fluturimit të dronit, të cilin e rrëzuan, tha RIA. Ata shpërndanë një fotografi të dronit të supozuar të rrëzuar.
