– Takimi do të kryesohet nga ministri turk i Punëve të Jashtme, Hakan Fidan dhe pritet të mbledhë zyrtarë të lartë nga të tre vendet
Raundi i tretë i bisedimeve të rinovuara për paqe midis Rusisë dhe Ukrainës, i ndërmjetësuar nga Turqia, pritet të nisë në Stamboll, raporton Anadolu.
Takimi trepalësh, që përfshin delegacionet nga Turqia, Rusia dhe Ukraina, është planifikuar të nisë në orën 19:00 me kohën lokale në Pallatin Çırağan.
Takimi do të kryesohet nga ministri turk i Punëve të Jashtme, Hakan Fidan dhe pritet të mbledhë zyrtarë të lartë nga të tre vendet.
Në takim do të marrin pjesë edhe kreu i Organizatës Kombëtare të Inteligjencës së Turqisë, İbrahim Kalın, si dhe shefi i Shtabit të Përgjithshëm të Ushtrisë Turke, gjenerali Metin Gürak.
Takimi shënon zhvillimin më të fundit të negociatave të rinovuara midis Moskës dhe Kievit në metropolin turk.
Dy raundet e para u mbajtën më 16 maj dhe 2 qershor. Gjatë këtyre bisedimeve, të cilat po ashtu u zhvilluan në Pallatin Çırağan, të dyja palët ranë dakord për shkëmbimin e mëtejshëm të robërve të luftës, me përparësi për më të rinjtë dhe më të plagosurit rëndë, si dhe për kthimin e trupave të 6 mijë ushtarëve nga secila palë.
Moska dhe Kievi gjithashtu shkëmbyen memorandume që përshkruajnë vizionin e tyre për t’i dhënë fund konfliktit që ka vazhduar që nga shkurti i vitit 2022.
Delegacioni i Rusisë do të udhëhiqet nga këshilltari presidencial Vladimir Medinsky, ndërsa Rustem Umerov, kreu i Këshillit të Sigurisë Kombëtare dhe Mbrojtjes së Ukrainës, do të udhëheq delegacionin e Kievit.
