Presidenti rus Vladimir Putin ka mbërritur në qytetin portual kinez Tianjin për një samit rajonal të sigurisë, për të cilin Kina pret që do t’i kundërvihet ndikimit perëndimor në çështjet globale.
Gjatë një vizite të rrallë katërditore te fqinji rus dhe partneri më i madh tregtar, Putini u prit me qilim të kuq në pistë nga zyrtarë të lartë të qytetit.
Marrëdhëniet mes Kinës dhe Rusisë janë “më të mirat në histori”, duke u bërë “më të qëndrueshmet, më të pjekurat dhe strategjikisht më të rëndësishmet mes vendeve kryesore”, raportoi televizioni shtetëror kinez CCTV në kronikën e mbërritjes.
Presidenti kinez Xi Jinping do të presë 20 liderë botërorë, përfshirë kryeministrin indian Narendra Modi, në një samit dyditor të Organizatës së Shangait për Bashkëpunim (SCO) – mbledhja më e madhe që nga themelimi i grupit në vitin 2001 mes gjashtë vendeve euroaziatike.
Ky bllok i fokusuar në siguri vitet e fundit është zgjeruar në 10 anëtare të përhershme dhe 16 vende dialoguese e vëzhguese. Veprimtaria e tij është shtrirë nga siguria dhe lufta kundër terrorizmit deri në bashkëpunim ekonomik e ushtarak.
Pritet që Xi ta shfrytëzojë samitin për të treguar se si do të dukej rendi ndërkombëtar nëse nuk do të dominohej nga SHBA, ndërkohë që do t’i japë gjithashtu një shtysë të dukshme diplomatike Rusisë së goditur nga sanksionet për shkak të pushtimit të Ukrainës, shkruan Reuters.
Një ditë para vizitës, Putin në një intervistë me shkrim për agjencinë zyrtare kineze Xinhua kritikoi ashpër sanksionet perëndimore, duke thënë se Moska dhe Pekini së bashku kundërshtojnë sanksionet “diskriminuese” në tregtinë globale.
Ekonomia ruse është buzë recesionit, e ngarkuar me kufizime tregtare dhe me kostot e luftës. Liderë nga Azia Qendrore, Lindja e Mesme, Azia Jugore dhe Azia Juglindore do të marrin pjesë në samit, që Kina dëshiron ta paraqesë si një tregues të fortë të unitetit të “jugut global” – një term që i referohet vendeve në zhvillim dhe atyre me të ardhura më të ulëta, kryesisht në hemisferën jugore.
