– Tubimi paqësor përfshinte momente të heshtjes për të reflektuar mbi koston njerëzore nga lufta brutale izraelite, me qëllim tërheqjen e vëmendjes pa bërtitur apo brohoritur
Një protestë e heshtur kundër sulmeve të Izraelit ndaj Palestinës është mbajtur pranë Shtëpisë Blair, ku qëndroi kryeministri izraelit Benjamin Netanyahu gjatë vizitës së tij në Washington, raporton Anadolu.
Pjesëmarrësit u mblodhën në heshtje për të shprehur kundërshtimin e tyre ndaj dhunës dhe për të treguar solidaritet me popullin palestinez, duke mbajtur pankarta dhe flamuj palestinezë. Disa prej tyre mbanin qirinj dhe fotografi të viktimave palestineze nga lufta izraelite.
Tubimi paqësor përfshinte momente të heshtjes për të reflektuar mbi koston njerëzore nga lufta brutale izraelite, me qëllim tërheqjen e vëmendjes pa bërtitur apo brohoritur.
Që nga tetori i vitit 2023, ushtria izraelite ka vrarë në Gaza të paktën 57.700 palestinezë, shumica prej tyre gra dhe fëmijë. Bombardimet e pamëshirshme e kanë shkatërruar enklavën palestineze dhe kanë çuar në mungesë ushqimi dhe përhapje sëmundjesh.
Nëntorin e kaluar, Gjykata Ndërkombëtare Penale lëshoi urdhërarreste ndaj kryeministrit Netanyahu dhe ish-ministrit të Mbrojtjes, Yoav Galant, duke i akuzuar për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën ndaj enklavës palestineze.
