Shtetet e Bashkuara të Amerikës kanë vendosur të mos lejojnë zyrtarët dhe diplomatët palestinezë të marrin pjesë në Asamblenë e Përgjithshme të Kombeve të Bashkuara në Nju Jork, e cila do të mbahet në fund të shtatorit. Vendimi përfshin edhe presidentin e Autoritetit Palestinez, Mahmoud Abbas, dhe sipas dokumenteve të siguruara nga gazetarët, Departamenti Amerikan i Shtetit ka urdhëruar anulimin e të gjitha vizave të lëshuara për përfaqësuesit palestinezë pas datës 31 korrik.
Ky veprim është pjesë e një pakete më të gjerë sanksionesh të vendosura ndaj Organizatës për Çlirimin e Palestinës (OÇP) dhe Autoritetit Palestinez (AP), pasi, sipas arsyetimit të Uashingtonit, ata nuk kanë përmbushur detyrimet e përcaktuara në ligjin PLO Commitments Compliance Act të vitit 1989 dhe Middle East Peace Commitments Act të vitit 2002.
“Në përputhje me ligjet amerikane dhe interesat kombëtare të sigurisë, Sekretari i Shtetit Marco Rubio vendosi t’i mohojë dhe t’i anulojë vizat anëtarëve të OÇP-së dhe Autoritetit Palestinez para Asamblesë së Përgjithshme të OKB-së,” tha zëvendës zëdhënësi i Departamentit të Shtetit, Tommy Pigott.
Ai theksoi se udhëheqja palestineze, përpara se të merret seriozisht si partnere për paqe, duhet të heqë dorë nga terrorizmi, fushatat ligjore në gjykatat ndërkombëtare dhe përpjekjet e njëanshme për njohjen ndërkombëtare të shtetësisë.
Edhe pse misioni palestinez në OKB do të marrë përjashtime sipas Marrëveshjes së selisë së OKB-së, Uashingtoni e bëri të qartë se “administrata e Trumpit nuk shpërblen terrorizmin” dhe është e gatshme të angazhohet vetëm nëse OÇP dhe AP ndërmarrin hapa konkretë drejt një qasjeje konstruktive.
Zëvendëssekretari i shtetit Christopher Landau shpjegoi më tej sanksionet, duke thënë se liderët palestinezë “shpallën njëanshëm shtetësinë, lavdëruan dhunën, përhapën antisemitizëm dhe financuan terroristë përmes praktikës së njohur si ‘paguaj e vrit’”.
Administrata amerikane reagoi veçanërisht ndaj raporteve se Abbas planifikonte të paraqiste në Asamblenë e Përgjithshme një “deklaratë kushtetuese” për shpalljen e pavarësisë së Palestinës. Në një dokument të brendshëm, Departamenti i Shtetit paralajmëroi gjithashtu se samiti franko-saudit i paralajmëruar për zgjidhjen me dy shtete, në të cilin do të merrnin pjesë palestinezët, mund të përbënte një “fitore të madhe propagandistike për Hamasin” dhe të ngushtonte hapësirën e diplomacisë amerikane në negociatat për armëpushimin dhe zgjidhjen politike të luftës në Gaza.
Vendimi i Uashingtonit për t’ia mohuar vizat tërë një delegacioni është rasti i parë i njohur i këtij lloji dhe vjen në një moment kur disa liderë evropianë, përfshirë kryeministrin britanik Keir Starmer dhe presidentin francez Emmanuel Macron, flasin hapur për nevojën e njohjes së shtetit palestinez.
Ky vendim po vlerësohet si një precedent në historinë e Kombeve të Bashkuara. Sipas Marrëveshjes së selisë së OKB-së të vitit 1947, shteti mikpritës – në këtë rast SHBA – është zotuar të lejojë hyrjen e të gjithë përfaqësuesve të shteteve anëtare dhe vëzhguesve, në mënyrë që ata të mund të kryejnë funksionet e tyre në OKB.
Edhe pse ka pasur raste kur autoritetet amerikane kanë vështirësuar ose vonuar dhënien e vizave për disa zyrtarë nga vende si Irani, Kuba apo Koreja e Veriut, kurrë më parë një delegacion i tërë nuk ishte penguar të merrte pjesë në Asamblenë e Përgjithshme. Rasti më i afërt ndodhi në vitin 1988 kur SHBA refuzoi t’i jepte vizë Yasser Arafatit, atëkohë lider i OÇP-së, gjë që detyroi Asamblenë të zhvendoste fjalimin e tij në Gjenevë.
Pikërisht për këtë arsye, lëvizja më e fundit e administratës Trump konsiderohet veçanërisht e diskutueshme, pasi shumë analistë paralajmërojnë se mund të interpretohet si një shkelje e drejtpërdrejtë e detyrimeve ndërkombëtare të SHBA ndaj OKB-së dhe të thellojë më tej marrëdhëniet tashmë të tensionuara të Uashingtonit me pjesën më të madhe të komunitetit ndërkombëtar lidhur me çështjen e shtetësisë palestineze.
