Kryeministri i Izraelit, Benjamin Netanyahu, për i24 tha se ndjen se është në një “mision historik dhe shpirtëror” dhe se është “shumë” i lidhur me vizionin e Izraelit të Madh, i cili përfshin territore të parashikuara për shtetin e ardhshëm palestinez dhe ndoshta edhe zona që janë pjesë e Jordanisë dhe Egjiptit të sotëm.
Gazetari Sharon Gal, i cili për një kohë të shkurtër ka qenë deputet i krahut të djathtë në Knesset, i dhuroi Netanyahut atë që e quan amulet me “hartën e Tokës së Premtuar”. Ai u bë shaka se nuk dëshironte të “përfshihej” më shumë Netanyahut në çështjen ndaj kryeministrit për marrjen e supozuar të bizhuterive dhe sendeve të tjera luksoze nga disa biznesmenë për të dhe gruan e tij, Sara.
I pyetur nëse ndjen lidhje me “këtë vizion” të Izraelit të Madh, Netanyahu u përgjigj: “Shumë”.
Vetë amuleti nuk shfaqet në ekran. Termi Izraeli i Madh është përdorur pas Luftës Gjashtëditore në qershor 1967 për të përshkruar Izraelin dhe territoret që sapo kishte pushtuar – Jerusalemin Lindor, Bregun Perëndimor, Rripin e Gazës, Gadishullin Sinai dhe Lartësitë e Golanit.
Ky term është përdorur edhe nga disa sionistë të hershëm, përfshirë Ze’ev Jabotinsky, pararendësin e partisë Likud të Netanyahut, për t’iu referuar Izraelit të sotëm, Gazës dhe Bregut Perëndimor, si dhe Jordanisë së sotme.
Pyetja e Galit për Izraelin e Madh erdhi pasi e pyeti kryeministrin nëse ndjen se është në një mision në emër të popullit hebre. Netanyahu u përgjigj se është “në një mision të brezave – ka breza hebrenjsh që kanë ëndërruar të vijnë këtu dhe breza hebrenjsh që do të vijnë pas nesh”.
“Pra, nëse më pyesni a kam ndjenjën e një misioni, historikisht dhe shpirtërisht, përgjigjja është po”, tha Netanyahu.
