Televizioni informativ arab Al Jazeera raportoi se, sipas të dhënave të mjekëve në enklavën palestineze, nga sulmet izraelite që nga mëngjesi i së shtunës kanë humbur jetën të paktën 37 persona, mes tyre edhe disa fëmijë.
Sipas gazetës izraelite Maariv, duke iu referuar burimeve nga ushtria, Netanyahu është i vetëdijshëm se qeveria e tij do të rrëzohej nëse nuk do të miratonte planin për pushtimin e qytetit të Gazës.
Sondazhi i fundit i këtij mediumi tregon se 62% e qytetarëve mendojnë se qeveria aktuale ka humbur besimin e shumicës së popullit. Për këtë kanë raportuar edhe Sky News dhe portali The Times of Israel.
“Netanyahu e kupton se pa një operacion në Gaza nuk mund të mbajë pushtetin – qeveria do të shpërbëhej”, tha për Maariv një burim nga sektori i sigurisë.
Ministria izraelite e Mbrojtjes të mërkurën miratoi planin ushtarak për pushtimin e qytetit të Gazës, si dhe mobilizimin e rreth 60.000 rezervistëve. Pushtimi nisi të njëjtën ditë.
Sipas një sondazhi të zhvilluar të mërkurën dhe të enjten, mbi 500 të anketuar u pyetën nëse besojnë se qeveria izraelite ende gëzon besimin e popullit. Vetëm 27% u pajtuan, ndërsa 46% besojnë se qeveria duhet të nënshkruajë një marrëveshje gjithëpërfshirëse për përfundimin e luftës në Rripin e Gazës.
Al Jazeera përsëriti se nga sulmet ajrore izraelite që nga mëngjesi i së shtunës kanë vdekur të paktën 37 palestinezë, mes tyre disa fëmijë.
