Një tregtar në Teheran, i cili shet ëmbëlsira dhe fruta të thata, është bërë viral në rrjetet sociale për shkak të ngjashmërisë së tij fizike me kryeministrin izraelit, Benjamin Netanyahu. Ndërsa pamjet kanë nxitur komente humoristike, raportohet se dyqani i tij është përballur edhe me bojkot.
Tensionet mes Iranit dhe Izraelit vazhdojnë prej vitesh, ndërsa u përshkallëzuan më 28 shkurt, pas sulmeve të SHBA-së dhe Izraelit ndaj Iranit.
Në valën e parë të sulmeve u shënjestruan udhëheqësi suprem iranian, Ajatollah Ali Khamenei, si dhe zyrtarë të lartë ushtarakë dhe të sigurisë.
Sulmet përfshinë infrastrukturën bërthamore dhe raketore, si dhe qendrat e komandës. Presidenti amerikan Donald Trump dhe kryeministri izraelit Benjamin Netanyahu i paraqitën ato si përpjekje për të eliminuar një “kërcënim ekzistencial” dhe për të krijuar kushte që iranianët të ndryshojnë regjimin e tyre.
Irani u kundërpërgjigj me sulme me raketa balistike dhe dronë ndaj Izraelit dhe bazave amerikane në rajon.
Sipas të dhënave të organizatave të pavarura për të drejtat e njeriut dhe institucioneve ndërkombëtare, mbi 1.700 civilë kanë humbur jetën në Iran si pasojë e sulmeve izraelite dhe amerikane.
Iraniani që ngjan si binjak me Netanyahun
Mes tensioneve të vazhdueshme, një video e pazakontë është bërë virale në rrjetet sociale iraniane.
Në pamjet e publikuara shihet një burrë i ulur pas banakut të një dyqani që shet ëmbëlsira, fruta të thata dhe produkte të tjera ushqimore.
Burri ka tërhequr vëmendjen për shkak të ngjashmërisë së madhe me kryeministrin izraelit Benjamin Netanyahu.
Vija e flokëve, tiparet e fytyrës dhe shprehja e tij janë krahasuar nga përdoruesit e rrjeteve sociale me ato të Netanyahut.
Bojkotohet për shkak të ngjashmërisë me Netanyahun
Videoja u përhap me shpejtësi në rrjetet sociale, ndërsa shumë përdorues nisën të pyesnin për adresën e dyqanit.
Disa iranianë reaguan me komente humoristike dhe ironike, por sipas raportimeve, tregtari është përballur edhe me bojkot vetëm për shkak të ngjashmërisë fizike me kryeministrin izraelit.
Pretendimet për bojkotin nuk janë konfirmuar në mënyrë të pavarur.
