Budva mbrëmë ishte nikoqire e një ngjarjeje të madhe të arteve marciale, të cilën e nderoi me praninë e tij ylli i madh i UFC-së, Conor McGregor, por moti i keq e prishi gjithçka dhe ndikoi në zhvillimin e eventit.
Në klubin Top Hill mbrëmë u mbajt eventi i BKFC që solli një numër përballjesh spektakolare me grushta të zhveshur. Pjesëmarrja e një prej luftëtarëve më të njohur të të gjitha kohërave, McGregor, e ngriti nivelin e mbrëmjes.
Megjithatë, gjithçka u prish nga shiu dhe stuhia e fuqishme që goditi jo vetëm Malin e Zi, por edhe pjesën më të madhe të rajonit të Evropës Juglindore.
Stuhia shkaktoi kaos, dhe në rrjetet sociale u publikuan pamje ku luftëtarët, shikuesit dhe organizatorët iknin nga shiu dhe era e fortë. Për këtë arsye, programi u ndërpre para se të zhvilloheshin dy ndeshjet e fundit.
Fansat prisnin me padurim duelin kryesor të mbrëmjes midis luftëtarit kontrovers Vaso Bakočević dhe Wilhelm Ott, por ai në fund nuk u zhvillua.
Kjo duhej të ishte debutimi për të dy luftëtarët në promovimin BKFC. Ndeshja me grushta të zhveshur ishte parashikuar për pesë raunde në kategorinë e mesme.
