Mjekët në Gaza thonë se janë detyruar të ngjeshin më shumë foshnja në një inkubator, pasi spitalet paralajmërojnë se mungesa e karburantit po i detyron të ndalojnë shërbimet jetike, duke vënë në rrezik jetët e pacientëve.
OKB-ja ka paralajmëruar se kriza e karburantit është në pikën kritike, me rezervat e vogla të disponueshme dhe “praktikisht asnjë furnizim shtesë.”
“Spitalet racionojnë. Ambulancat bllokohen. Sistemet e ujësjellësit janë në prag të kolapsit. Dhe numri i viktimave që kjo situatë mund të shkaktojë mund të rritet shpejt, përveç nëse autoritetet izraelite lejojnë hyrjen e karburantit të ri – urgjentisht, rregullisht dhe në sasi të mjaftueshme,” tha Zyra për Koordinim Humanitar (OCHA).
Bllokada njëmbëdhjetëjavore izraelite e ndihmës humanitare më herët këtë vit ka shtyrë popullatën e enklavës, mbi 2 milionë palestinezë, drejt urisë dhe thellimit të krizës humanitare. Deri në maj, ishin lejuar vetëm furnizime të kufizuara ndihmash, por organizatat humanitare thonë se ato nuk mjaftojnë për të përballuar nevojat.
CNN i kërkoi koment Agjencisë COGAT, përgjegjëse për koordinimin e ndihmës në Gaza, për këtë mungesë karburanti.
Drejtori i Spitalit Al-Ahli, në jug të qytetit të Gazës, postoi të mërkurën në rrjete sociale një foto nga një tjetër qendër—Al-Helou—ku shihej grup foshnjash të ngujuara në të njëjtin inkubator.
“Kjo mbipopullim tragjik nuk është thjesht çështje mungese pajisjesh – është pasojë direkte e luftës mizore në Gaza dhe e bllokadës shtrëngues që ka shkatërruar të gjithë sistemin shëndetësor. Obliga përkujdesjeje ndaj foshnjave të parakohëshme është kthyer në betejë për jetën ose vdekjen. Asnjë fëmijë nuk duhet të lindë në një botë ku bombat dhe bllokadat vendosin nëse do të mbijetojë apo jo,” shkroi dr. Fadel Naim në postimin në X.
Drejtori i Spitalit Al-Shifa në veri të Gazës tha se mungesa e karburantit i ka detyruar të mbyllin pavionet e dializës së veshkave për t’u përqëndruar tek kujdesi intensiv dhe sallat e operacionit.
“Nëse karburanti nuk arrin në Al-Shifa brenda disa orëve, spitali do të ndalojë punën brenda tri orëve, duke çuar në vdekje masive,” tha për CNN dr. Mohammad Abu Silmiya, duke shtuar se në rrezik janë qindra pacientë, përfshirë 22 foshnja në inkubatorë.
Pamjet nga spitali tregojnë mjekë që punojnë me drita dore ndërsa trajtojnë pacientët.
Kompleksi Mjekësor Nasser tha se i kanë vetëm 24 orë karburant dhe po përqendrohen tek pavionet jetike, si gjinekologjia dhe kujdesi intensiv.
Përveç karburantit, vështirësi sjell edhe gjetja e pjesëve rezervë për gjeneratorët që furnizojnë spitalet në Gaza, gjë që rrezikon mbylljen e më shumë qendrave shëndetësore.
“Jo vetëm që karburanti është problemi kryesor për ndezjen e gjeneratorëve në spitalet tona, tani problemi kryesor është të gjejmë pjesët rezervë për t’i zëvendësuar ato të vjetra,” tha të mërkurën për CNN Ministria e Shëndetësisë e Gazës.
Spitali “Muçedidet al-Aksa” në Gaza qendrore lëshoi një deklaratë urgjente se gjeneratori kryesor ka dështuar për shkak të mungesës së pjesëve rezervë, duke e detyruar të mbështetet në një njësi më të vogël.
“Karburanti do të përfundojë brenda orëve të ardhshme, dhe jetët e qindra pacientëve janë në rrezik brenda pavioneve. Mbyllja e spitalit do të ndërpresë shërbimet e kujdesit shëndetësor për gjysmë milioni njerëz në qarkun qendror,” theksohet në deklaratë.
Përveç spitaleve, karburanti është jetik për shërbimet bazë në Gaza: gatimin, proceset e desalinimit, trajtimin e ujërave të zeza dhe për automjetet e shpëtimit.
Izraeli ka kufizuar vazhdimisht hyrjen e karburantit gjatë gjithë konfliktit, duke pretenduar se Hamas mund ta përdorë atë për të lëshuar armë.
Organizata humanitare Mjekët Pa Kufij (MSF) paralajmëroi të martën për një krizë humanitare të paprecedentë në Gaza dhe bëri thirrje për armëpushim dhe hyrje të ndihmës në nivel shumë më të lartë.
“Ekipet tona po trajtojnë të plagosurit dhe po mbështesin spitalet e mbingarkuara, ndërsa sulmet jo selektive dhe bllokada kërcënojnë miliona burra, gra e fëmijë. Ne apelojmë te autoritetet izraelite dhe qeveritë bashkëpunuese që mundësojnë këto krime, përfshirë qeverinë e Mbretërisë së Bashkuar, të ndërpresin menjëherë bllokadën dhe të marrin masa për të ndaluar zhdukjen e palestinezëve nga Gaza,” thuhej në deklaratën e MSF.
