Elon Musk dhuroi gjithsej 15 milionë dollarë në qershor organizatave politike që mbështesin presidentin amerikan Donald Trump dhe republikanët në Kongres, tregojnë raportet e reja të financimit të fushatave.
Dhurime nga 5 milionë dollarë për secilën nga grupet MAGA Inc., Senate Leadership Fund dhe Congressional Leadership Fund u realizuan më 27 qershor, në mes të grindjes së ashpër të Muskut me Trumpin mbi legjislacionin federal të shpenzimeve, dhe vetëm disa ditë para se njeriu më i pasur në botë të njoftonte themelimin e partisë së tij politike.
Drejtori ekzekutiv i Teslës figuron në raportet si donatori më i madh individual për secilin nga këta organizata.
Raportet e fushatës të dorëzuara në Komisionin Federal të Zgjedhjeve (FEC) tregojnë se Musk i ka dhënë mbi 45 milionë dollarë paratë e tij në America PAC gjatë këtij viti, grup që ai vetë e administron, ndërkohë që, pa sukses, përpiqej të ndikonte në rezultatin e zgjedhjeve për Gjykatën e Lartë të Wisconsinit.
Në zgjedhjet e vitit 2024, Musk shpenzoi më shumë se 290 milionë dollarë për të ndihmuar në fitoren e Trumpit dhe kandidatëve të tij të preferuar për Kongres.
Për disa muaj këtë vit, ai shërbeu si këshilltar kryesor në Shtëpinë e Bardhë dhe si drejtor i Departamentit joformal për Efikasitetin e Qeverisë, para se të largohej nga shërbimi shtetëror për t’u fokusuar te kompanitë e tij.
Atëherë ai la të kuptohet se mund të reduktonte financimin politik.
Megjithatë, në fillim të korrikut, Musk u përfshi sërish në një përplasje publike me Trumpin dhe republikanët në Kongres për politikën e brendshme, duke pretenduar se ajo do të shtonte ndjeshëm deficitin e shtetit.
Ai gjithashtu premtoi themelimin e partisë America Party, megjithëse deri tani ka pak dëshmi konkrete që ka ndërmarrë hapa drejt kësaj nisme.
Raporti i dorëzuar në FEC të enjten përfshin aktivitetet e super PAC-ut të tij deri në fund të qershorit.
