Presidenti i Kroacisë, Zoran Milanoviq, reagoi ndaj hetimit kundër pilotit të Forcave Ajrore të Kroacisë, J. I. (54), të cilin prokuroria e ngarkon me akuzën për spiunazh. Në një njoftim nga kabineti i tij thuhet se presidenti “shpreh mbështetje për të gjitha institucionet e Republikës së Kroacisë, para së gjithash Agjencinë e Sigurisë Ushtarake (VSOA), të cilat me veprimet e tyre kanë konstatuar mundësinë e kryerjes së veprave penale në dëm të Republikës së Kroacisë dhe kanë ndërmarrë masat e duhura për zbulimin e të dyshuarve dhe parandalimin e veprimeve të mëtejshme”.
Milanoviq theksoi se ishte i informuar me kohë për aktivitetet e shërbimeve kompetente dhe pret një hetim efikas që do të sqarojë të gjitha faktet relevante.
Piloti mohon akuzat
Piloti, i arrestuar së bashku me partneren e tij A. M., shtetase e Serbisë që jeton dhe punon në Kosovë, mohon akuzat dhe pretendon se dikush po i sajon. Ai e quan partneren “viktimë kolaterale”. Miq e kolegë e përshkruajnë atë si profesionist dhe thonë se akuzat i kanë befasuar. Nga Ministria e Mbrojtjes është konfirmuar se ai kishte kaluar të gjitha kontrollet e sigurisë.
Megjithatë, prokuroria vlerëson se ka mjaftueshëm prova për hapjen e hetimit. Çifti u arrestua në Vis, ndërsa fillimisht A. M. u dërgua në qendrën për të huaj në Trilj me vendim për dëbim, por më pas u përfshi në hetimin për spiunazh.
Për çfarë dyshohen?
Sipas hetimit, piloti nga viti 2022 deri në vitin 2025 dyshohet se i ka dhënë partneres së tij të dhëna të ndjeshme për lëvizjet e serbëve në veri të Kosovës, për trupat e KFOR-it dhe situatën në Zubin Potok. Gjithashtu, dyshohet se kanë shkëmbyer informacione edhe për transportin e ish-policit kosovar Dejan Pantiq, arrestimi i të cilit në dhjetor 2022 shkaktoi protesta dhe barrikada.
Në atë kohë partnerja e tij punonte në Kosovë, bashkëpunonte me gazetarë dhe një qeveri të huaj. Të afërmit e saj thonë se ajo shpesh qëndronte në Kroaci dhe i konsiderojnë akuzat befasuese, duke theksuar se ajo nuk ishte afër politikisht me Aleksandar Vuçiç.
Reagime politike
Rasti ka shkaktuar reagime të gjera politike në Kroaci.
-
Arsen Bauk, kryetar i Komisionit për Mbrojtjen në Sabor, tha se bëhet fjalë për një problem serioz sigurie dhe se duhet pritur rezultati i hetimeve.
-
Sandra Bençiç nga lëvizja Možemo! theksoi se interesi kryesor është siguria e qytetarëve dhe misioneve kroate jashtë vendit.
-
Igor Peternel nga DOMiNO u shpreh se “siguria në Kroaci është shumë e diskutueshme”.
-
Deputeti i SDP-së Mišel Jakšiç kërkoi përgjigje për mundësitë e dështimit të kontrolleve të sigurisë, ndërsa Dario Hrebak nga HSLS tha se raste të tilla mund të ndodhin në çdo vend, por beson se shërbimet do të reagojnë siç duhet.
