Sekretari i Përgjithshëm i NATO-s, Mark Rutte, tha se kompania më e madhe turke e elektronikës së mbrojtjes, ASELSAN, po udhëheq një revolucion në industrinë e mbrojtjes që do t’i sjellë përfitime çdo anëtari të NATO-s. Ai shtoi se në Samitin e Ankarasë do të organizohet një ditë e madhe kushtuar industrisë së mbrojtjes.
Industria e mbrojtjes e Türkiye-s po vazhdon të rrisë rëndësinë e saj në sektor.
Me rritjen e eksportit dhe të teknologjisë së lartë në vitet e fundit, industria turke e mbrojtjes, e cila ka tërhequr vëmendjen e gjithë botës, është bërë një nga temat më të rëndësishme para Samitit të NATO-s që do të mbahet në Ankara.
Sekretari i Përgjithshëm i NATO-s, Mark Rutte, para Samitit që do të mbahet më 7-8 korrik në Ankara, vizitoi Shtetet e Bashkuara të Amerikës dhe mbajti një fjalim në Këshillin Atlantik.
Transformim historik në investimet e mbrojtjes
Në fjalimin e tij, Mark Rutte tha se Samiti i Ankarasë do të tregojë fuqinë parandaluese, unitetin dhe kapacitetin mbrojtës të Aleancës.
Duke theksuar se NATO do të tregojë se është e gatshme të mbrojë të gjithë aleatët dhe çdo pëllëmbë të territorit të saj, Rutte tha se pritja e tij më e madhe nga samiti është një transformim historik në investimet e mbrojtjes.
Rriten shpenzimet e mbrojtjes
Duke kujtuar se në Samitin e Hagës u mor një vendim historik që deri në vitin 2035, 5 për qind e prodhimit të brendshëm bruto (PBB) të ndahet për mbrojtjen, Rutte tha se Estonia, Letonia, Lituania dhe Polonia e kanë tejkaluar këtë objektiv, ndërsa Gjermania po ecën drejt dyfishimit të shpenzimeve të mbrojtjes deri në vitin 2029.
Aleatët ndanë 1.2 trilion dollarë për mbrojtjen
Mark Rutte tha se aleatët evropianë dhe Kanadaja gjatë periudhës 2016-2026 kanë ndarë 1.2 trilion dollarë shtesë për mbrojtjen, ndërsa në vitin 2025 investimet në mbrojtje janë rritur me rreth 20 për qind.
“Kjo është një zhvillim transformues”, tha ai.
Duke theksuar se një ndryshim i tillë në shpenzimet e mbrojtjes as nuk mund të imagjinohej dhjetë vjet më parë, Rutte vuri në dukje se mjedisi i kërcënimeve ka ndikuar në këtë transformim, por edhe udhëheqja e presidentit amerikan Donald Trump ka luajtur një rol përcaktues.
Po mbyllet hendeku në shpenzimet e mbrojtjes
Mark Rutte tërhoqi vëmendjen se aleatët evropianë dhe Kanadaja kanë hyrë në një proces të ngushtimit të hendekut me SHBA-në në shpenzimet e mbrojtjes. Ai tha se ata po marrin më shumë përgjegjësi në strukturën komanduese të NATO-s, po kontribuojnë më shumë në aktivitetet parandaluese në krahun lindor, në rajonin e Baltikut dhe në Arktik, si dhe po udhëheqin mbështetjen për Ukrainën.
“Hapa në shkallë të gjerë dhe një transformim i vërtetë”
Duke e përshkruar këtë proces me fjalët “Ja, kjo është NATO 3.0: një Evropë më e fortë dhe një NATO më e fortë; unitet qëllimi, hapa në shkallë të gjerë dhe një transformim i vërtetë”, Rutte theksoi se tashmë nevojitet kapacitet prodhues për të përmbushur kërkesën në rritje për mbrojtje.
Në Samitin e Ankarasë do të dalin në pah teknologjitë inovative
Mark Rutte tha se në Samitin e Ankarasë industria e mbrojtjes dhe teknologjitë inovative do të jenë në fokus.
“Në Ankara pres të shoh përfshirjen e industrisë dhe inovacionit në këtë proces, në mënyrë që të sigurojmë kapacitetet që kërkon një parandalim i besueshëm dhe një mbrojtje efektive”, tha ai.
Rutte theksoi se aleatët po i rrisin buxhetet e mbrojtjes, por kapacitetet ushtarake të nevojshme nuk po prodhohen me shpejtësinë dhe në shkallën e duhur. Ai shtoi se kjo nuk është vetëm çështje rezervash, por kërkon edhe zhvillimin e zgjidhjeve inovative.
