Manchester United mposhti Burnley-n me rezultatin 3:2 në xhiron e 3-të të Premierligës, duke ardhur kështu te fitorja e parë në sezon, ndërsa trajneri Ruben Amorim për momentin i shpëtoi shkarkimit që i “qëndronte mbi kokë”.
United e nisi më mirë ndeshjen dhe kaloi në epërsi pas një autogoli të pafat të Josh Cullen në minutën e 27-të, por gëzimi i vendasve nuk zgjati shumë.
Përforcimi i ri, Matheus Cunha, u detyrua ta lëshojë fushën për shkak të një lëndimi në minutën e 31-të – një goditje e rëndë për Amorimin dhe ekipin e tij.
Burnley më pas e rivendosi ekuilibrin dhe arriti të barazojë. Shënues ishte Lyle Foster, i cili shfrytëzoi pakujdesinë e mbrojtjes së United-it dhe realizoi për 1:1 në minutën e 55-të.
Vetëm disa sekonda pas rifillimit të lojës, United sërish kaloi në avantazh. Mbeumo shfrytëzoi një pasim të shkëlqyer nga Dalot dhe realizoi për 2:1. Megjithatë, mysafirët nuk u dorëzuan dhe lojën e mirë e kurorëzuan në minutën e 66-të kur Anthony barazoi në 2:2.
Dhe kur dukej se ndeshja do të përfundonte barazim, Anthony bëri një gabim të madh në minutën e 92-të duke shkaktuar penallti, të cilën Bruno Fernandes e realizoi me siguri për 3:2 dhe festë të madhe të “Djajve të Kuq”.
Në ndeshjen e ardhshme, Manchester United do të përballet në derbin e madh me Manchester Cityn, ndërsa Burnley do të presë Liverpoolin.
Rezultatet e tjera:
-
Sunderland – Brentford 2:1
-
Tottenham – Bournemouth 0:1
-
Wolverhampton – Everton 2:3
