Presidenti i Venezuelës Nicolás Maduro deklaroi dje se Shtetet e Bashkuara “nuk kanë asnjë shans” të pushtojnë vendin e tij, ndërsa tensionet rriten dhe forcat detare amerikane po grumbullohen në Detin e Karaibeve pranë ujërave territoriale të Venezuelës.
Maduro siguroi se vendi i tij është i përgatitur mirë për të mbrojtur sovranitetin, ndërsa anijet luftarake amerikane po afrohen nga rajone prej të cilave mund të ndërmarrin sulme dhe zbarkime në tokën venezuelase.
“Nuk ka shanse të hyni në Venezuelë. Sot jemi më të fortë se dje. Sot jemi më të gatshëm për të mbrojtur paqen, sovranitetin dhe integritetin territorial”, tha Maduro.
Presidenti i Venezuelës këto ditë po qëndron me forcat ushtarake dhe policinë, të cilat megjithatë nuk kanë arritur të mposhtin formacionet e armatosura të karteleve të drogës në vend.
Përkrahja nga përfaqësuesit në OKB
Deklaratat e Maduros u mbështetën edhe nga ambasadori i Venezuelës në OKB, Samuel Moncada, i cili tha se plani amerikan është një agresion klasik.
“Kjo është një operacion propagandistik masiv për të justifikuar atë që ekspertët e quajnë ‘aksion kinetik’, që do të thotë ndërhyrje ushtarake kundër një vendi sovran dhe të pavarur që nuk përbën kërcënim për askënd”, tha Moncada.
Ai shtoi se dislokimi i një nëndetëseje bërthamore nga SHBA është tregues i vërtetë i natyrës së qëllimeve amerikane.
“Thonë se dërgojnë nëndetëse bërthamore… Është qesharake të mendosh se do të luftojnë kundër tregtisë së drogës me nëndetëse bërthamore”, ironizoi ambasadori.
Prania ushtarake amerikane
Të paktën shtatë anije luftarake amerikane, së bashku me një nëndetëse bërthamore, ndodhen përballë ujërave territoriale të Venezuelës. Këtyre forcave detare u janë bashkuar mbi 4.500 trupa amerikane, përfshirë rreth 2.200 marinsa.
