Megjithëse është 39 vjeç, një nga futbollistët më të mëdhenj të të gjitha kohërave, Lionel Messi, ka marrë një ofertë për të ndryshuar klub dhe për të provuar veten në një kampionat tjetër para se të përfundojë karrierën.
Messi ndihet i lumtur te Inter Miami dhe nuk ka ndërmend të largohet, por gazeta prestigjioze franceze L’Équipe raporton se sulmuesi argjentinas ka marrë një ofertë spektakolare nga Arabia Saudite.
Bëhet fjalë për kampionin aktual të Azisë, klubin Al Ahli, i cili ka aktivizuar të gjitha forcat e tij për ta bindur Messin që t’i bashkohet ekipit.
Kontrata e Messit me Inter Miami skadon këtë dimër, dhe në klub janë të bindur se ai do të qëndrojë në Florida. Megjithatë, sauditët synojnë t’u prishin planet dhe t’ua “vjedhin” Argjentinasin.
Më parë, Messi ka pasur një ofertë të ngjashme nga Arabia Saudite, por atëherë nga Al Hilal. Ata i kishin ofruar një kontratë prej 1.5 miliardë eurosh për tri vjet, por ai zgjodhi të transferohej në Shtetet e Bashkuara.
“Është e vërtetë që kam menduar shumë për t’u transferuar në Arabinë Saudite. Njoh vendin dhe ata kanë krijuar një kampionat shumë të fuqishëm, që mund të bëhet një ligë e rëndësishme në të ardhmen e afërt. Si ambasador i turizmit të Arabisë Saudite, ajo ishte një destinacion që më tërhoqi,” kishte thënë Messi në 2023, kur mori ofertën e parë “të papërballueshme” nga Lindja e Mesme.
Sipas kontratës aktuale që ka me Autoritetin e Turizmit të Arabisë Saudite si ambasador, Messi do të përfitojë pak më shumë se 20 milionë euro për një periudhë trevjeçare.
