– Përleshjet kufitare midis dy fqinjëve të Azisë Jugore kanë hyrë në ditën e 5-të me të paktën 35 të vdekur.
Përleshjet midis forcave tajlandeze dhe kamboxhiane vazhdojnë në ditën e pestë pavarësisht bisedimeve të planifikuara për paqe midis dy fqinjëve në Malajzi, thanë zyrtarët dhe raportet e mediave lokale, transmeton Anadolu.
Udhëheqësit e Tajlandës dhe Kamboxhias do të takohen për bisedime paqeje sot mes armiqësive të përshkallëzuara për shkak të një mosmarrëveshjeje territoriale përgjatë kufirit të tyre të përbashkët.
Zëdhënësja e Ministrisë së Mbrojtjes të Kamboxhias, gjenerallejtënant Maly Socheata akuzoi forcat tajlandeze për përdorimin e armëve kimike, raportoi “Khmer Times”.
Në një konferencë për media, Socheata tha se forcat tajlandeze hapën sulm ndaj Ta Moan Thom dhe Ta Krabei sot në mëngjes, pavarësisht faktit se kryeministri kamboxhian dhe kryeministri në detyrë tajlandez janë planifikuar të takohen në Malajzi.
Ajo pretendon se nga e diela, forcat tajlandeze kanë përdorur avionë ajrorë për të kryer sulme me gaz helmues në disa zona kamboxhiane. Para se të nisej për në Malajzi, kryeministri në detyrë i Tajlandës, Phumtham Wechayachai u tha gazetarëve se nuk beson se Kamboxhia po vepron “me mirëbesim”.
“Ata duhet të demonstrojnë qëllim të vërtetë dhe ne do ta vlerësojmë këtë gjatë takimit”, shtoi ai.
Në një deklaratë, Departamenti Amerikan i Shtetit tha se zyrtarët amerikanë janë në terren në Malajzi për të ndihmuar këto përpjekje paqeje.
“Unë dhe presidenti (i SHBA-së) Trump mbetemi të angazhuar me homologët tanë përkatës për secilin vend dhe po e monitorojmë situatën nga afër. Ne duam që ky konflikt të përfundojë sa më shpejt të jetë e mundur”, tha Sekretari amerikan i Shtetit, Marco Rubio në deklaratë.
Në një zhvillim të lidhur me këtë, ministrat e Jashtëm të ASEAN-it bënë thirrje për armëpushim të menjëhershëm midis Tajlandës dhe Kamboxhias, duke shprehur shqetësim të thellë për numrin në rritje të të vdekurve dhe ndikimin humanitar përgjatë kufirit të tyre të kontestuar, raportoi e përditshmja malajziane në anglisht “Malay Mail”.
Të paktën 35 persona janë vrarë dhe më shumë se 200 mijë janë zhvendosur në përleshjet midis dy forcave që nga e enjtja.
