Kryebashkiaku i Barcelonës, Jaume Collboni, reagoi pas vendimit të Izraelit për t’i ndaluar hyrjen në këtë vend, duke thënë se Tel Avivi, edhe në këtë mënyrë, kërkon të izolojë popullin palestinez dhe të fshehë nga bota shkeljet e të drejtave të njeriut në Gaza.
Collboni, qyteti i të cilit ka ndërprerë marrëdhëniet me Izraelin, në një postim në Instagram në gjuhën katalane theksoi se ishte ftuar nga kolegët palestinezë në Ramallah dhe Betlehem për të parë nga afër realitetin e qyteteve palestineze.
Mbështetje për Palestinën
Ai sqaroi se udhëtimi duhej të përfshinte një takim në Jerusalemin Lindor me grupet izraelite të majta B’Tselem dhe Peace Now, vendosjen e kurorave mbi varret e ish-kryeministrit izraelit Yitzhak Rabin dhe presidentit të Autoritetit Palestinez Yasser Arafat, si dhe vizitën në një kamp të ri në Aman të drejtuar nga UNRWA, agjencia e OKB-së për refugjatët palestinezë, të cilën Izraeli e akuzon për bashkëpunim me grupe terroriste.
“Vendimi për t’ia ndaluar hyrjen delegacionit të Barcelonës është një akt armiqësor. Kjo vetëm e forcon vendosmërinë tonë për paqe, drejtësi dhe njohjen e të drejtave të popullit palestinez. Zëri i tyre është edhe i yni,” përfundoi Collboni.
