Përplasja e fundit përkon me uljen e marrëdhënieve diplomatike të Kamboxhias me Tajlandën në “nivelin më të ulët”
Të paktën nëntë persona janë vrarë pasi trupat tajlandeze dhe kamboxhiane u përleshën të enjten në një zonë të diskutueshme të kufirit të tyre, me të dyja palët që akuzuan njëra-tjetrën për nisjen e përplasjes së fundit, raportuan zyrtarët dhe mediat lokale, transmeton Anadolu.
Ushtria e Tajlandës konfirmoi në një deklaratë se numri i të vdekurve tajlandezë nga sulmet ndërkufitare është rritur në nëntë, përfshirë një fëmijë, pasi predhat e artilerisë të qëlluara nga Kamboxhia goditën disa vende. Të paktën 14 persona janë plagosur gjithashtu.
Kamboxhia nuk ka publikuar asnjë informacion mbi viktimat deri më tani.
Pas sulmeve, pati zhvendosje në të dyja anët e kufirit.
Ministria e Arsimit e Tajlandës mbylli shkollat pranë kufirit në rrethin Phanom Dong Rak të rajonit Surin. Kamboxhia gjithashtu evakuoi nxënës dhe mësues nga zonat e prekura.
Ushtria e Tajlandës dërgoi një avion luftarak F-16 kundër forcave të armatosura të Kamboxhias, ndërsa tensionet prej javësh për shkak të një mosmarrëveshjeje kufitare u përshkallëzuan në përleshje që kanë vrarë të paktën dy civilë, raportoi “Thai Inquirer”, duke cituar Ushtrinë Mbretërore Tajlandeze.
Një nga gjashtë avionët luftarakë F-16 që Tajlanda ishte gati të vendoste përgjatë kufirit të kontestuar, qëlloi në Kamboxhia dhe shkatërroi një objektiv ushtarak.
“Ne kemi përdorur fuqinë ajrore kundër objektivave ushtarake siç ishte planifikuar”, u tha gazetarëve zëvendëszëdhënësi i ushtrisë tajlandeze, Richa Suksuwanon.
Ushtria më vonë konfirmoi se të gjithë avionët F-16 u kthyen në shtëpi të sigurt.
Forcat e armatosura kamboxhiane nisën gjithashtu një kundërsulm kundër trupave tajlandeze herët të enjten, raportoi “Khmer Times”, duke cituar Ministrinë e Mbrojtjes të vendit.
“Kamboxhia gjithmonë i është përmbajtur parimit të saj për zgjidhjen e mosmarrëveshjeve me mjete paqësore”, tha kryeministri Hun Manet. “Por në këtë situatë, nuk kemi zgjidhje tjetër veçse të përgjigjemi me forcë ushtarake kundër agresionit të armatosur”, shtoi ai.
Përplasja e fundit ndodhi një ditë pasi një ushtar tajlandez humbi këmbën në një shpërthim mine tokësore.
Ushtria e Tajlandës akuzoi trupat kamboxhiane se kanë qëlluar një bazë ushtarake tajlandeze në një zonë pranë Tempullit të lashtë Ta Muen Thom – i cili shtrihet në territorin e diskutueshëm në jug të provincës Surin të Tajlandës, raportoi “Bangkok Post”, duke cituar Ushtrinë Mbretërore Tajlandeze.
Ministria e Mbrojtjes e Kamboxhias tha se trupat e saj kishin vepruar në vetëmbrojtje pas një ndërhyrjeje të paprovokuar nga ushtarët tajlandezë.
– Kamboxhia ul nivelin e marrëdhënieve diplomatike
Kamboxhia tha të enjten se po ul marrëdhëniet diplomatike me Tajlandën në nivelin më të ulët dhe po tërheq gjithë stafin e saj diplomatik nga Bangkoku, raportoi “Khmer Times”, duke cituar Ministrinë e Jashtme të vendit.
I gjithë stafi diplomatik kamboxhian i vendosur në Ambasadën e Kamboxhias në Bangkok është urdhëruar të kthehet në shtëpi.
Kjo vjen një ditë pasi Tajlanda dëboi ambasadorin kamboxhian dhe thirri të dërguarin e saj nga Phnom Penhi për shkak të incidentit të shpërthimit të minës tokësore.
Tensionet midis dy vendeve janë rritur që nga 28 maji, kur trupat shkëmbyen zjarr pranë kufirit, duke rezultuar në vdekjen e një ushtari kamboxhian.
