– “Turqia pëlqehet nga të gjitha palët negociuese. Ne jemi mirënjohës ndaj Ankarasë dhe qeverisë turke për iniciativat e tyre për të zgjidhur çështjen (ukrainase)”, tha Peskov
Zëdhënësi i Kremlinit, Dmitry Peskov deklaroi se i janë mirënjohës Turqisë për përpjekjet e saj për të zgjidhur çështjen e Ukrainës, transmeton Anadolu.
Duke iu referuar mundësisë së një takimi midis presidentit rus Vladimir Putin dhe presidentit të SHBA-së Donald Trump në Kinë, Peskov tha se Putin do të vizitojë këtë vend në fillim të shtatorit, por se nuk janë bërë përgatitje për një takim Putin-Trump.
“Një takim dypalësh nuk mund të përjashtohet, nëse presidenti i SHBA-së vendos të vizitojë Kinën në të njëjtat data, por ende nuk ka përgatitje për këtë çështje. Fillimisht për këtë nevojiten që të zhvillohen punime në nivel ekspertësh”, theksoi Peskov.
Lidhur me mundësinë e një takimi Putin-Trump në Turqi, Peskov shtoi se presidenti Recep Tayyip Erdoğan ka treguar vullnet politik për këtë çështje. “Megjithatë, nuk ka një zhvillim konkret për këtë çështje”, tha zëdhënësi i Kremlinit.
Ai vuri në dukje se negociatat e drejtpërdrejta midis Rusisë dhe Ukrainës u zhvilluan nën mikpritjen e Turqisë. “Turqia pëlqehet nga të gjitha palët negociuese. Ne jemi mirënjohës ndaj Ankarasë dhe qeverisë turke për iniciativat e tyre për të zgjidhur çështjen (ukrainase). Gjithashtu i jemi mirënjohës qeverisë turke për kushtet që ka siguruar për zhvillimin e negociatave”, tha Peskov.
Sipas tij, Rusia është e gatshme për të vazhduar negociatat me Ukrainën.
“Pala ruse ka propozuar krijimin e tre grupeve të punës për të vepruar në internet gjatë raundit të tretë të negociatave”, tha Peskov duke shtuar se po presin përgjigje nga Ukraina për këtë çështje.
