Në Prishtinë u bë hapja e kuzhinës së parë popullore e ngritur për qytetarët në nevojë.
Kuzhina është themeluar në bashkëpunim mes Fondacionit “Eyüp Sultan” të Stambollit dhe Odës Ekonomike Turqi-Kosovë, me mbështetjen e Ambasadës së Turqisë në Prishtinë dhe kontributet e kompanive turke që veprojnë në Kosovë. Në këtë kuzhinë popullore do të shpërndahen çdo ditë ushqime për 200 persona.
Hapja u bë nga Ambasadori i Turqisë në Prishtinë, Tunç Angılı, me pjesëmarrjen e Kryetarit të Bordit të Fondacionit “Eyüp Sultan” të Stambollit, İskender Yanova, Këshilltarit për Çështje Fetare të Ambasadës së Turqisë në Prishtinë, Bünyamin Albayrak, Kryetarit të Odës Ekonomike Turqi-Kosovë, Abdurrahman Balkız, Drejtorit të Përgjithshëm të Atlantik Group, Ayhan Demirkıran dhe Drejtorit Financiar Murat Çelik.
Pas hapjes, të ftuarit shpërndanë me duart e tyre çantat e veçanta që përmbanin enë me ushqim për qytetarët në nevojë.
Duke folur për Kosovaport, Kryetari i Fondacionit “Eyüp Sultan”, İskender Yanova, tha se me këtë hapësirë synojnë të vazhdojnë shpërndarjen e ushqimit që e kishin nisur më parë me çadrat e Ramazanit, duke shtuar: “Me mbështetjen e vëllezërve tanë turq dhe të kompanive turke në Kosovë, për herë të parë në këtë organizim do të dërgojmë çdo ditë ushqim në shtëpitë e 200 vëllezërve tanë”.
Ambasadori Angılı, i cili vizitoi kuzhinën popullore dhe u njoftua për punën e saj, deklaroi për Kosovaport se është shumë i lumtur, dhe se ideja për këtë kuzhinë ka lindur gjatë bisedave me İskender Yanova, i cili çdo vit ngrit çadrën e Ramazanit në Prishtinë. Ai shtoi se për realizimin e kësaj ideje kanë punuar për dy vjet dhe se beson se kuzhina popullore do të jetë shumë e dobishme për qytetarët në nevojë, falë mbështetjes së Ambasadës dhe kontributit të Odës Ekonomike Turqi-Kosovë dhe kompanive turke.
Kryetari i Odës Ekonomike Turqi-Kosovë, Abdurrahman Balkız, tha se ideja për kuzhinën popullore ishte një projekt shumë i mirë, i cili që nga fillimi u përkrah me simpati nga të gjithë anëtarët. Ai theksoi se shumë anëtarë e mbështetën projektin dhe shtoi: “Për aq kohë sa kuzhina popullore do të vazhdojë të funksionojë, të gjithë anëtarët tanë do ta vazhdojnë mbështetjen”.
Këshilltari për Çështje Fetare i Ambasadës së Turqisë në Prishtinë, Bünyamin Albayrak, në deklaratën e tij tha se sot në Prishtinë u realizua një risi: një kuzhinë popullore hyri në shërbim, duke theksuar: “Ashtu si më parë, edhe sot, vëllezërit që kanë mundësi do të ndajnë ushqimin dhe bukën e tyre me ata që nuk kanë. Që nga fillimi i historisë së njerëzimit ka pasur gjithmonë ata që kanë dhe ata që nuk kanë. Ata që kanë ndarë ushqimin me të tjerët përmes sadakasë, lëmoshës, dhe zekatit. Në kuzhinën që u hap sot në Kosovë u dha një shembull i shkëlqyer i ndarjes”.
Në kuzhinën popullore që ndodhet në rrugën “Bajram Kelmendi” në lagjen “Katër Llullat” të Prishtinës, do të shpërndahen çdo ditë ushqime për familjet në nevojë nga ora 15:00 deri në orën 16:00.
