Sipas mediave izraelite, Shefi i Shtabit të Përgjithshëm, Eyal Zamir, paralajmëroi se objektivat e luftës në Gaza mund të jenë “të paarritshme” për shkak të mungesës së ushtarëve.
Zamir bëri këtë paralajmërim gjatë një konsultimi të fundit të sigurisë, duke theksuar se në rast të një pushtimi të plotë, Izraeli mund të mos arrijë të çlirojë rehinjtë. “Kujtoni se mund t’i humbasim,” tha ai.
Ky paralajmërim erdhi në të njëjtën kohë kur ushtria izraelite njoftoi të dielën thirrjen në detyrë të dhjetëra mijë rezervistëve për t’u përgatitur për zgjerimin e ofensivës në Gaza, dhe Zamir po ashtu konfirmoi se synimi i ushtrisë ishte shkatërrimi i “të gjithë infrastrukturës së Hamas-it.”
“Këtë javë thërrasim në detyrë dhjetëra mijë rezervistë për të forcuar dhe zgjeruar operacionin tonë në Gaza. Po rrisim presionin për të çliruar rehinjtë tanë dhe për të mundur Hamas-in. Do të shkatërrojmë çdo pjesë të infrastrukturës së tyre, si mbi tokë ashtu edhe nën tokë,” tha Zamir.
Në paralajmërimin e tij, ai theksoi se qeveria izraelite kishte vendosur dy qëllime të luftës: mposhtjen e Hamas-it dhe kthimin e rehinjve. “Megjithatë, këto dy qëllime janë në konflikt me njëri-tjetrin,” shtoi ai.
Ai sugjeroi gjithashtu që qeveria të përqendrohej te shpëtimi i rehinjve të mbetur gjallë dhe të “braktiste qëllimin e shkatërrimit të Hamas-it.”
Sipas Channel 13, pas fjalëve të Zamir, gjatë takimit të sigurisë u shfaqën mosmarrëveshje mes zyrtarëve të sigurisë dhe Kryeministrit Benjamin Netanyahu për planin e ushtrisë për zgjerimin e operacioneve në Gaza.
