Ministria e Punëve të Brendshme dhe Komunikimeve e Japonisë publikoi të dhënat e reja sipas të cilave vendi humbi më shumë se 900.000 banorë gjatë vitit të kaluar — rënia më e madhe vjetore e regjistruar ndonjëherë.
Sipas shifrave të së mërkurës, numri i shtetasve japonezë u pakësua me 908.574 në vitin 2024. Që nga kulmi prej 126,6 milionë banorësh në vitin 2009, popullsia ka rënë për 16 vite rresht, për shkak të faktorëve si problemet ekonomike dhe normat gjinore të rrënjosura thellë.
Meqenëse numri i shtetasve pritet të bjerë ndjeshëm edhe për dekada, vendi do të ndiejë goditje në sistemet e pensioneve dhe të shëndetësisë, si dhe në infrastrukturën sociale që është e vështirë të mbahet me një fuqi punëtore në tkurrje.
Qeveria po përpiqet prej më shumë se një dekade ta frenojë këtë rënie, dhe vitet e fundit ka përshpejtuar masat: subvencione për lindje e strehim dhe inkurajim që etërit të marrin leje prindërore.
Pesha e të moshuarve është shumë e lartë — rreth 30% e popullsisë — ndërsa pjesa e të rinjve në moshë riprodhuese dhe pune po zvogëlohet vazhdimisht. Viti i kaluar shënoi rekord të zi: u lindën vetëm 687.689 foshnja (më e ulëta që nga 1968), ndërsa vdekjet arritën në 1,6 milionë, niveli më i lartë i regjistruar ndonjëherë.
