Kancelari gjerman Friedrich Merz deklaroi se aktualisht nuk do t’ua rekomandonte fëmijëve të tij të jetojnë apo studiojnë në Shtetet e Bashkuara të Amerikës, duke përmendur ndryshimin e shpejtë të klimës shoqërore dhe mundësitë e kufizuara madje edhe për njerëzit me arsim të lartë.
Këto deklarata tregojnë për tensionet ndërmjet SHBA-së dhe aleatëve të saj evropianë, ndërsa mosmarrëveshjet rreth tregtisë, luftës në Ukrainë dhe tani edhe konfliktit me Iranin po e rëndojnë më tej aleancën e NATO-s.
Merz muajin e kaluar kishte deklaruar se SHBA-ja ishte poshtëruar në luftën me Iranin, gjë që kishte zemëruar presidentin amerikan Donald Trump. Disa ditë më vonë, Washingtoni njoftoi tërheqje të pjesshme të trupave nga Gjermania dhe rritje të tarifave doganore për automobilat nga Bashkimi Evropian, sektor në të cilin Gjermania është veçanërisht e fuqishme.
Duke folur para të rinjve në një konventë katolike në Wuerzburg, Merz tha se njerëzit shumë shpesh mendojnë në mënyrë katastrofike kur bëhet fjalë për gjendjen e botës dhe u bëri thirrje gjermanëve të jenë më optimistë për potencialin e vendit të tyre.
“Besoj fuqishëm se ka pak vende në botë që ofrojnë aq shumë mundësi, veçanërisht për të rinjtë, sa Gjermania. Nuk do t’ua rekomandoja fëmijëve të mi që sot të shkojnë në Amerikë, të arsimohen dhe të punojnë atje, thjesht sepse atje papritur është zhvilluar një klimë e caktuar shoqërore”, tha Merz, i cili ka tre fëmijë, dhe shtoi:
“Sot edhe njerëzit më të arsimuar në Amerikë kanë vështirësi të mëdha për të gjetur punë.”
Merz mori detyrën në vitin 2025 si një mbështetës i deklaruar i marrëdhënieve transatlantike, por që nga ajo kohë ka kritikuar aleatin më të fuqishëm të Gjermanisë.
Nga ana tjetër, Trump deklaroi se Merz duhet të fokusohet në rregullimin e shtetit të shkatërruar.
“Jam një admirues i madh i Amerikës. Admirimi im për momentin nuk po rritet”, shtoi Merz mes të qeshurave dhe duartrokitjeve të publikut.
