Shefja e politikës së jashtme të Bashkimit Evropian, Kaja Kallas, deklaroi se pasuria e Bankës Qendrore Ruse, e ngrirë brenda BE-së, nuk mund t’i kthehet Rusisë derisa t’i paguajë Ukrainës dëmshpërblimin e luftës.
“E shohim që Rusia nuk dëshiron paqe, edhe pse po bëhen shumë përpjekje diplomatike për të ulur në tryezën e bisedimeve Zelenskin dhe Rusinë. Ne do të merremi seriozisht me çështjen e pasurisë së ngrirë,” tha Kallas.
Ajo e komentoi këtë temë në prag të takimit joformal të ministrave të jashtëm të BE-së që do të mbahet sot në Kopenhagë.
“Nuk mund ta imagjinojmë kthimin e asaj pasurie Rusisë nëse nuk ka kompensuar dëmet që i ka shkaktuar Ukrainës,” shtoi Kallas.
Ajo theksoi se kjo çështje është veçanërisht e ndjeshme, por se është e domosdoshme që BE të hartojë një strategji të qartë.
Sipas të dhënave të BE-së, rreth 210 miliardë euro pasuri ruse janë ngrirë në BE si pjesë e sanksioneve të vendosura ndaj Moskës për shkak të pushtimit të Ukrainës.
Gazeta Pravda raporton se BE po shqyrton krijimin e një fondi të posaçëm që do të mundësonte përdorimin e pasurisë së ngrirë ruse për rindërtimin e Ukrainës.
