Qendra Kërkimore Alma në analizën më të fundit sjell një udhëzues të detajuar se si të përmirësohet imazhi ndërkombëtar i Izraelit, i cili është dëmtuar nga operacionet e ushtrisë izraelite në Rripin e Gazës, Liban, Siri, Iran dhe Jemen. Vlerësimi fillestar i analizës së Qendrës Alma është se ushtria izraelite, me epërsinë e saj tekniko-teknologjike, arrin të gjitha objektivat ushtarake. Megjithatë, sukseset ushtarake mbulohen nga imazhi më i keq i Izraelit në narrativat globale ndërkombëtare.
Ajo që është interesante të theksohet është qëndrimi i tyre se për këtë gjendje fajtorët më të mëdhenj janë mediat globale, ndër të cilat kryesojnë ato amerikane. Në këtë kontekst përmenden shembuj të palestinezëve që kanë vdekur nga uria, për të cilët propagandistët izraelitë pretendojnë se kanë vdekur nga sëmundje të tjera.
Analiza thekson se imazhi ndërkombëtar i Izraelit nuk është problem vetëm për Izraelin, por edhe për aleatët e tij më të afërt, duke konfirmuar kështu tezën se reputacioni i keq e bën Tel Avivin një partner gjithnjë e më të papëlqyeshëm në Lindjen e Mesme.
Duke marrë parasysh të gjitha sa më sipër, si dhe të gjitha qasjet e deritanishme të Izraelit në luftën mediatike dhe informative, qendra Alma jep gjashtë propozime konkrete që Izraeli të arrijë fitore në luftën e narrativave dhe informacionit, të barabartë me atë në fushën e betejës:
- Lufta kognitive – që nënkupton formimin e qendrave për shpërndarjen e dezinformatave me infiltrime në Al Jazeera dhe shtëpi të tjera mediatike që raportojnë nga Rripi i Gazës dhe Bregu Perëndimor.
- Shpejtësia – përshpejtimi i përgjigjeve ndaj informacioneve të publikuara nga Hamasi. Sipas Alma, përpjekjet izraelite për të reaguar ndaj dezinformatave palestineze zgjasin më shumë seç duhet, ndaj zgjidhja do të ishte dhënia e informacionit të menjëhershëm.
- Më shumë burime dhe organizim më i mirë – për arsye se Izraeli ka investuar shumë pak në grupe propagandistike dhe lobuese në SHBA dhe Evropë, gjë që ka sjellë humbje në luftën informative. Në këtë kontekst, këshillohet formimi i një rrjeti unik mediash dhe grupesh që do të shpërndanin të njëjtat përmbajtje në intervale të koordinuara.
- Ndarja e Hamasit nga mburojat njerëzore – që nënkupton përpjekjet për të dëbuar luftëtarët palestinezë nga pozicionet e tyre të fortifikuara, tunelet dhe strehimet, në mënyrë që forcat ajrore izraelite të mos përdorin armë që shkaktojnë shumë viktima civile – diçka që në luftën informative kthehet kundër tyre.
- Narrativa e njëanshme – që lidhet me ndryshimin strategjik të mendimit në Izrael, me qëllim që beteja mediatike të shihet po aq e rëndësishme sa ajo ushtarake. Në të kundërt, humbet mundësia për operacione efektive informative. Analiza sugjeron që ushtria izraelite të zvogëlojë kufizimet mbi informacionet dhe të ndajë më shumë të dhëna në rrjetet sociale për të arritur më shpejt dhe më drejtpërdrejt tek opinioni botëror.
- Formimi i ushtrisë informative – këshilla më e rëndësishme, që bazohet në propozimin e profesorit Kobi Michael, sipas të cilit duhet të krijohet një degë e ushtrisë izraelite e dedikuar për luftën informative globale dhe të shpejtë. Këto forca do të vepronin në të gjitha rrjetet sociale dhe platformat 24/7, sipas një dinamike të paracaktuar propagandistike. Objektiv kryesor i këtyre forcave do të ishin institucionet, agjencitë dhe shtëpitë mediatike që promovojnë përpjekjet palestineze për mbrojtje nga Izraeli.
