Presidenti amerikan, Donald Trump ka reaguar pas sulmeve të Izraelit ndaj Iranit – ku raportohet edhe për viktima, pos dëmeve materiale.
Në një mesazh të gjatë në platformën Truth Social, ai i bëri thirrje Iranit të arrijë një marrëveshje me SHBA-në dhe të heqë dorë nga krijimi i armës bërthamore.
Trump shtoi se e kishte paralajmëruar Iranin për pasojat që do të vinin nëse nuk bashkëpunonin: “U thashë se do të ishte shumë më keq se çdo gjë që dinin, prisnin ose që u ishte thënë. SHBA prodhon pajisjet ushtarake më të mira dhe më vdekjeprurëse në botë — pa dyshim — dhe Izraeli ka shumë prej tyre, me të tjera që po vijnë. Dhe ata dinë si t’i përdorin.”
Duke folur për sulmet e fundit izraelite, Trump deklaroi se ekstremistët iranianë “folën me guxim, por nuk e dinin çfarë i priste. Tani janë të gjithë të vdekur — dhe do të bëhet edhe më keq!”
Ai e mbylli mesazhin me një paralajmërim të fortë për udhëheqësit iranianë “tashmë ka pasur shumë vdekje dhe shkatërrim, por ende ka kohë për t’i dhënë fund kësaj gjakderdhjeje. Sulmet e ardhshme të planifikuara janë edhe më brutale. Irani duhet të bëjë një marrëveshje, para se të mos mbetet më asgjë dhe të shpëtojë atë që dikur njihej si Perandoria Iraniane. Mjaft më me vdekje, mjaft më me shkatërrim — thjesht bëjeni, para se të jetë tepër vonë. Zoti ju bekoftë të gjithëve!”
Ndryshe, në qendër të sulmeve të Izraelit ndaj Iranit qëndron programi bërthamor i diskutueshëm i Teheranit.
Ky i fundit thotë se synon të zotërojë teknologjinë bërthamore për qëllime paqësore dhe mohon akuzat nga fuqitë perëndimore se po përpiqet të zhvillojë armë bërthamore. /Telegrafi/
