Izraeli, gjatë sulmit të tij ndaj Iranit, ka goditur reaktorin kyç bërthamor të vendit – objektin në Natanz, që është një nga shtyllat kryesore të programit bërthamor iranian.
Sipas televizionit shtetëror iranian, i cili citohet nga Reuters, në orët e para të mëngjesit ka ndodhur një shpërthim i ri në objektin bërthamor të Natanzit, rreth 225 kilometra në jug të Teheranit. Bëhet fjalë për një nga objektet kryesore të pasurimit të uraniumit në Iran, i cili prej vitesh monitorohet nga Agjencia Ndërkombëtare për Energjinë Atomike (IAEA).
IAEA ka konfirmuar se objekti në Natanz ishte një nga objektivat e sulmeve izraelite dhe se është në kontakt me autoritetet iraniane për të vlerësuar nëse ka ndryshime në nivelet e rrezatimit.
Çfarë është Natanz dhe pse është objektiv?
Kompleksi i Natanzit, i vendosur në provincën qendrore Isfahan, është një nga objektet më të rëndësishme të programit bërthamor iranian. Atje ndodhen një numër i madh centrifugash për pasurimin e uraniumit, përfshirë modele të avancuara që përdoren për të arritur pastrim deri në 60% – shumë pranë nivelit të nevojshëm për ndërtimin e një arme bërthamore. Për këtë arsye, objekti është nën mbikëqyrje të vazhdueshme nga inspektorët e IAEA-së dhe prej vitesh është shënjestruar nga sulme dhe sabotime izraelite.
Objekti është ndërtuar dhe forcuar nëntokë për ta bërë më rezistent ndaj sulmeve ajrore, por shpërthimet e konfirmuara sot nga burime iraniane dhe izraelite sugjerojnë se është goditur pavarësisht këtyre masave mbrojtëse.
Netanyahu: Do të mbrohemi për aq sa të jetë e nevojshme
Kryeministri izraelit Benjamin Netanyahu deklaroi se sulmet kishin për qëllim të “dëmtonin infrastrukturën bërthamore të Iranit, fabrikat e raketave balistike dhe shumë kapacitete të tjera ushtarake”.
Në një deklaratë të regjistruar paraprakisht dhe publikuar në YouTube, ai tha:
“Kjo operacion do të zgjasë aq sa të jetë e nevojshme për të zmbrapsur kërcënimin e zhdukjes që rëndon mbi ne.”
