Izraeli do të rrisë shpenzimet për mbrojtjen me 42 miliardë shekel (12,5 miliardë dollarë) në vitet 2025 dhe 2026, thuhet në raportin e ministërive të Financave dhe Mbrojtjes. Marrëveshja buxhetore do t’i lejojë ministrisë së fushës “të përshpejtojë punët urgjente dhe thelbësore të prokurimit, me rëndësi kyçe për sigurinë kombëtare”.
Ministri izraelit i Financave, Bezalel Smotrich, deklaroi se buxheti i ri i mbrojtjes “mbulon plotësisht luftërat intensive në Gaza, me përgatitje gjithëpërfshirëse sigurie kundër çdo kërcënimi – nga jugu, veriu dhe arena më të largëta”.
Shpenzimet ushtarake të Izraelit janë rritur që kur Izraeli nisi ofensivën ushtarake në Gaza.
Ministri i Mbrojtjes, Israel Katz, tha se këto fonde do t’i mundësojnë Izraelit të përgatitet për skenarë të ndryshëm, sepse “armiqtë deklarojnë hapur qëllimin për të na shkatërruar”.
“Për këtë na duhet superioritet i plotë ushtarak, teknologjik dhe operativ”, theksoi ai.
Ndërkohë, Ministria e Mbrojtjes së Izraelit njoftoi se ka nënshkruar një kontratë me kompaninë shtetërore Israel Aerospace Industries (IAI) për përshpejtimin e prodhimit në seri të interceptuesve “Arrow”.
“Arrow” është zhvilluar dhe prodhuar në bashkëpunim me Agjencinë Amerikane të Mbrojtjes Kundër-Raketash, dhe është një sistem mbrojtës kundër raketave, i dizajnuar për të kapur dhe shkatërruar projektelet balistike.
Gjithashtu, është nënshkruar një kontratë prej 20 milionë dollarësh me Israel Weapon Industries (IWI) për furnizimin me mitralozë të avancuar, me qëllim rritjen e ndjeshme të kapaciteteve zjarrfikëse të forcave tokësore të IDF.
