Në Qeverinë e Serbisë të enjten i ka ardhur një letër ministrit të Punëve të Brendshme, Ivica Daçiç, në të cilën janë gjetur tre plumba. Një ditë më vonë, nga MPB u njoftua se policia ka identifikuar dhe gjetur personin që kishte dorëzuar dërgesën.
“Gjatë shpërndarjes së rregullt të postës në ndërtesën e Qeverisë së Republikës së Serbisë, më 28 gusht 2025, është vërejtur një zarf i adresuar për zëvendëskryeministrin dhe ministrin e Punëve të Brendshme Ivica Daçiç. Gjatë kontrollit të sigurisë me pajisjen me rreze X, në zarf janë gjetur tre plumba”, thuhet në njoftimin e MPB-së.
Në komunikatë shtohet se është konstatuar që kjo dërgesë ishte dorëzuar më 26 gusht 2025 në një filial të Postës së Serbisë në Požarevac, dhe se policia ka identifikuar dhe gjetur personin që e kishte dorëzuar.
“Puna për sqarimin e të gjitha rrethanave të ngjarjes është në vazhdim. MPB po ndërmerr të gjitha masat dhe veprimet e parashikuara me ligj për mbrojtjen e sigurisë së qytetarëve dhe institucioneve të Republikës së Serbisë”, përfundon njoftimi.
