“Italia është kundër çdo vendbanimi izraelit në Bregun Perëndimor sepse kjo do të minonte themelet e projektit ‘dy popuj, dy shtete'”, tha ministri i Jashtëm, Antonio Tajani
Ministri i Jashtëm i Italisë, Antonio Tajani, përsëriti të mërkurën kundërshtimin e vendit të tij ndaj aktivitetit të ndërtimit të vendbanimeve të paligjshme izraelite në Bregun Perëndimor të pushtuar, duke paralajmëruar se kjo rrezikon të minojë zgjidhjen me dy shtete, transmeton Anadolu.
“Italia është kundër çdo vendbanimi izraelit në Bregun Perëndimor sepse kjo do të minonte themelet e projektit ‘dy popuj, dy shtete’, e vetmja zgjidhje për të ndërtuar një paqe të qëndrueshme në Lindjen e Mesme”, tha Tajani në X.
OKB-ja i konsideron të gjitha vendbanimet izraelite në territorin e pushtuar palestinez të paligjshme sipas ligjit ndërkombëtar dhe ka paralajmëruar vazhdimisht se zgjerimi i tyre dëmton qëndrueshmërinë e një zgjidhjeje me dy shtete.
Që nga fillimi i luftës gjenocidale të Izraelit në Rripin e Gazës në tetor 2023, të paktën 1.013 palestinezë janë vrarë dhe më shumë se 7.000 janë plagosur në Bregun Perëndimor nga forcat izraelite dhe kolonët e paligjshëm, sipas Ministrisë së Shëndetësisë.
Në një mendim këshillimor korrikun e kaluar, Gjykata Ndërkombëtare e Drejtësisë (GJND) e shpalli të paligjshëm pushtimin e territorit palestinez nga Izraeli dhe bëri thirrje për evakuimin e të gjitha vendbanimeve në Bregun Perëndimor dhe Kudsin Lindor.
