Ish-kryeministri izraelit Ehud Olmert, i cili drejtoi vendin nga viti 2006 deri në 2009, ka kritikuar ashpër veprimet ushtarake të Izraelit në Gaza, duke thënë se ato nuk kanë një qëllim të qartë.
Duke vënë në dukje se Britania, Franca dhe Kanadaja kanë hapur çështjen e njohjes së shtetit palestinez, Olmert theksoi se aleatët tradicionalë të Izraelit po tërhiqen dhe se për këtë, përgjegjësinë e mban vetëm kryeministri aktual Benjamin Netanyahu dhe koalicioni i tij i djathtë.
“Ekziston një hendek gjithnjë e më i madh midis krimeve të tmerrshme që Hamas kreu ndaj izraelitëve më 7 tetor dhe asaj që po u bëjmë tani palestinezëve. Jemi bërë një shtet i përjashtuar,” tha Olmert për Politico.
Ai shtoi se kancelari gjerman Friedrich Merz po përballet me një presion të brendshëm në rritje për t’u bashkuar me vendet e tjera të BE-së në sanksionimin e Izraelit për shkak të Gazës, gjë që do të shënonte një ndërprerje kritike të mbështetjes tradicionalisht të palëkundur të Berlinit.
“Po humbasim atë lloj mbështetjeje ndërkombëtare që gjithmonë e ka lidhur Izraelin me elementët më të fortë, më të fuqishëm, më të rëndësishëm dhe më të ndritur të botës perëndimore. Ajo që po bëjmë në Gaza është një luftë shfarosjeje,” tha ai.
Olmert gjithashtu paralajmëroi se propozimi i qeverisë izraelite për të grumbulluar banorët e Gazës në një “qytet humanitar” – të cilin ai e quajti kamp përqendrimi – do të ishte i barasvlershëm me spastrim etnik, duke shtuar se komandantët e lartë ushtarakë izraelitë janë të kujdesshëm ndaj një plani të tillë.
