Televizioni shtetëror iranian IRIB njoftoi se dje është ekzekutuar Rouzbeh Vadi, një shkencëtar bërthamor, i akuzuar për dhënie informacionesh rreth programit bërthamor iranian agjencisë izraelite të inteligjencës Mossad.
Në një “pranim” të transmetuar nga IRIB, Vadi thotë:
“Unë dërgova të dhëna për objektet kyçe Fordow dhe Natanz. U tha që t’u dërgoja gjithë informacionin që kisha për Fordow.”
Ai shton se hyrja dhe dalja e materialeve bërthamore nga Fabrika e Përpunimit të Uranit dhe Njësia e Prodhimit të Karburantit ishin ndër pikat më të rëndësishme të bashkëpunimit.
Sipas videos, Vadi – me doktoraturë në inxhinieri bërthamore nga Universiteti Teknik Amir Kabir – ka pasur pesë takime me agjentë të Mossad-it në Vjenë, ku i ofruan pagë përmes kriptovalutave dhe garancinë e një pasaporte të huaj nëse bashkëpunonte afatgjatë.
IRIB tregoi edhe një dokument shkencor të vitit 2012, prezantuar në një konferencë bërthamore iraniane, ku Vadi figuron si hulumtues në Organizatën Iraniane për Energji Atomike, së bashku me dy kolegë të tjerë – Ahmad Zolfaqar dhe Abdolhamid Minouchehr – që u vranë nga Izraeli në qershor.
